InfoHub Logo

Қызылорда облысында «Таза Қазақстан» республикалық экологиялық бағдарламасы аясында ауқымды тазалық акциясы өтті. Шараға облыс әкімі Мұрат Ергешбаев қатысып, қоршаған ортаны қорғауға үлес қосқан 100 қызметкерді марапаттады.

Бұл туралы Infohub.kz ақпарат агенттігі хабарлайды.

Ботаникалық саябақта өткен акцияға облыс бойынша 17 мыңнан астам адам қатысты. Олардың қатарында зиялы қауым өкілдері, депутаттар, мемлекеттік мекеме қызметкерлері, жастар мен экобелсенділер болды.

Аймақ басшысының сөзі

Облыс әкімі Мұрат Ергешбаев мемлекет басшысының «Тазалық – өркениетті қоғамның айнасы» деген сөзін еске алып, қоршаған ортаны қорғау әр азаматтың міндеті екенін атап өтті. Оның айтуынша, өңірде санитарлық тазалық пен абаттандыру жұмыстары қарқынды жүргізілуде. Қаланың бірқатар демалыс орындары қайта жаңғыртылып, пайдалануға берілген. Сондай-ақ, 80-нен астам ескі тұрғын үйдің қасбеттері заманауи үлгіде жаңартылған.

Техникамен қамтамасыз ету

Экологиялық инфрақұрылымды нығайту мақсатында салалық мекемелерге 26 арнайы техника табысталды. Олардың қатарында қалдық тасымалдайтын көліктер, өрт сөндіру техникалары, тракторлар және кіші өрт сөндіру кешендері бар.

Жасыл желек және сенбілік

Ботаникалық саябақ аумағына 500 түп қылқан жапырақты ағаш отырғызылды. Бұл жұмыстар өңірді жасыл желекке бөлеуге, ауа сапасын жақсартуға бағытталған. «Таза Қазақстан» бағдарламасы аясында облыстың барлық елді мекенінде ауқымды сенбілік және абаттандыру жұмыстары ұйымдастырылды.

Жыл басынан бергі көрсеткіштер

Жыл басынан бері өңірдегі экологиялық шараларға 121 мыңнан астам адам қатысты. Осы уақыт ішінде 3 мың тоннадан астам тұрмыстық қалдық шығарылып, скверлер, парктер, тарихи-мәдени ескерткіштер, әлеуметтік нысандар, су объектілері мен көше бойлары тазартылды. Бұл жұмыстарға 548 арнайы техника жұмылдырылды. Сонымен қатар, 88 мыңнан астам ағаш көшеті отырғызылды.