InfoHub Logo

Атырау облысының Құрманғазы ауданында ірі қара мал арасында жұқпалы инфекциялық ринотрахеит ауруы анықталды. Осыған байланысты бірнеше ауылдық округте карантин жарияланып, ветеринарлық бақылау күшейтілді.

Бұл туралы Infohub.kz ақпарат агенттігі хабарлайды.

Мамандардың айтуынша, індет Дыңғызыл, Бөкейхан, Еңбекші және Құрманғазы ауылдық округтерінде тіркелген. Аталған аумақтардан мал шығаруға уақытша тыйым салынды.

Аурудың таралуы және емдеу шаралары

Қазіргі таңда 1407 ірі қара ауру жұқтырған. Оның мыңнан астамы емделіп, сауығып шыққан. Қалған малға ем-дом шаралары жүргізіліп, сау малдарға профилактикалық екпелер егілуде.

Қабылданған шектеулер

Облыстық Ауыл шаруашылығы басқармасының бөлім басшысы Сайран Ғұднанның мәліметінше, карантин жарияланған ауылдарда мал етін сатуға және ветеринарлық анықтама беруге шектеулер қойылды. Маманның айтуынша, Ресей Федерациясынан мал тасымалының жиілеуі аурудың таралу қаупін арттырған.

Адамға жұғу қаупі

Ветеринар дәрігерлер инфекциялық ринотрахеиттің негізінен жануарлар арасында таралатынын, адамға жұғу жағдайлары өте сирек екенін атап өтті. Қазіргі уақытта адам арасында ауру тіркелмеген.

Қосымша жағдайлар

Құрманғазы ауданымен шектесетін Исатай ауданындағы Зинеден ауылында да 70-ке жуық сиырдың ауырғаны анықталды. Барлық ветеринариялық шаралар аяқталып, мал толық сауыққаннан кейін 30 күн өткен соң карантиндік шектеулер алынады.