InfoHub Logo

Биылғы шілде айынан бастап автомат беріліс қорабы бар көліктерді жүргізуші куәлігіндегі шектеу алынып тасталады. Бұл туралы Қазақстан Ішкі істер министрлігінің жаңа бұйрығында айтылған.

Бұл туралы Infohub.kz ақпарат агенттігі хабарлайды.

Ішкі істер министрлігі көліктерді сату, емтихан тапсыру және жүргізуші куәлігін беру рәсімдерін цифрландыруды бастап кетті. Жаңа ережелер көліктерді тіркеу, жүргізушілерді даярлау және куәлік беруге қатысты көптеген өзгерістерді қамтиды. Бұл бұйрық 12 мамырда тіркеліп, көптеген нормалар он күннен кейін, ал қалғандары 12 шілдеден бастап күшіне енеді.

Көлік сатудың жаңа форматы

Енді көлік сату-сатып алу мәмілесін толықтай онлайн форматта рәсімдеуге болады. Бұрын нотариустың қатысуымен ғана жүзеге асатын бұл процесс енді электронды цифрлық қолтаңба арқылы немесе банк қосымшалары арқылы жүзеге асырылады. Бірыңғай электронды өтініш жүйесі арқылы сатушы көлікті есептен шығаруға өтініш береді. Система көліктің іздеуде немесе шектеуде барын тексереді. Содан кейін сатып алушы көлікті өз атына тіркеуді растайды. Барлық тексерулерден кейін тіркеу куәлігін шығару автоматты түрде жүреді.

Биометриялық идентификация және цифрлық тексеру

Тұлғаны растау үшін енді тек жеке куәлік емес, мемлекеттік цифрлық жүйелер арқылы биометриялық идентификация да қолданылады. Бұл талап көлік тіркеу және қызмет көрсету кезінде міндетті болады. Көліктерді тексеру де толық цифрлық форматқа көшеді. Ішкі істер органдарының қызметкерлері көліктің фотосын және идентификациялық нөмірлерін түсіріп, нәтижесін электронды акті ретінде рәсімдейді. Бұл акт 14 күн жарамды болады.

«Сыпайы» нөмірлер мен автомектептер

«Сыпайы» мемлекеттік нөмірлер нарығы да ретке келтіріледі. «Көлік нөмірін таңдау» қызметі арқылы арнайы комбинацияларға ақы төлеу жүйесі бекітіледі. Автомектептерге де жаңа талаптар енгізіледі. «Автомектеп» атты цифрлық жүйе оқу топтарын бақылап, бұзушылықтарды автоматты түрде блоктап отырады. Топтарда 30 адамнан аспауы, бұрынғы топтарға жаңа оқушыларды қоспау және толық курс алмағандарға куәлік бермеу сияқты ережелер қатаңдатылады. Автомектепті бітіргені туралы куәліктер тек электронды түрде беріліп, екі жыл жарамды болады.

Емтихан тапсыру және куәліктер

Жүргізуші куәлігіндегі беріліс түрі туралы жазба алынып тасталады. Бұрын автомат беріліспен емтихан тапсырғандар тек сондай көліктерді ғана жүргізе алатын болса, енді бұл шектеу жойылады. Сондай-ақ, жүргізуші куәлігін eGov mobile қосымшасы арқылы цифрлық форматта алуға болады. Емтихан тапсыру үшін портал арқылы немесе банк қосымшалары арқылы жазылуға болады. Егер биометриялық тексеруден өте алмаса, емтиханға алты айға дейін жіберілмейді. Бұл шара басқа біреудің атынан емтихан тапсыру әрекеттерімен күресуге бағытталған. Теориялық емтиханнан өту үшін кемінде 32 сұраққа дұрыс жауап беру қажет.