InfoHub Logo

Қазақстандағы көптеген қалаларда маслихаттар 2026 жылға арналған үйді ұстаудың ең төменгі тарифтерін бекітуді кешеуілдетіп отыр. Бұл жағдай тұрғындар арасында түсініспеушілік тудырып, олардың төлемдерді қалай жүргізу керектігі туралы сұрақтарын туындатуда.

Бұл туралы Infohub.kz ақпарат агенттігі хабарлайды.

Минималды тариф дегеніміз не және оның қажеті қандай?

Минималды тариф – бұл пәтер иелерінің әр ай сайын үйді басқаруға және жалпыдомовой мүлікті (шатырлар, кіреберістер, жертөлелер, коммуникациялар) ұстауға төлейтін ақшасы. Алматы тұрғындарының түбіртектерінде бұл «үйді ұстауға арналған шығын» (РСЖ) деп белгіленуі мүмкін. Бұл тариф барлық жерде қолданыла бермейді. Егер пәтер иелері жалпы жиналыста шешім қабылдаса, бұл сома жоғарырақ болуы мүмкін, бірақ ең төменгі деңгейден кем болмауы тиіс.

Тариф қанша уақытқа жарамды және кім есептейді?

Минималды тарифті есептеумен тұрғын үй инспекциясы айналысады. Ол үшін арнайы әдістеме бар. Бұл әдістеме 2020 жылы енгізілген болатын. Ал өткен жылдан бастап минималды тариф айлық есептік көрсеткішке (АЕК) және инфляцияға байланыстырылды. Минималды жарнаның сомасын есептеуді тұрғын үй инспекциясы жүргізеді, ал маслихат бекітеді. Бұл процедура жыл сайын өтуі керек, яғни әр жаңа жылда жаңа тариф бекітілуі тиіс.

«Жергілікті өкілді органдар айлық есептік көрсеткіш мөлшерінде нысандарды басқаруға арналған жарналардың ең төменгі мөлшерін бекітеді. Минималды тариф бір жыл ғана жарамды және инфляцияны ескере отырып, міндетті түрде қайта бекітілуге жатады», - деп түсіндірді ҚР Индустрия және құрылыс министрлігінің Құрылыс және тұрғын үй-коммуналдық шаруашылық істері комитеті төрағасының орынбасары Қанат Мыңбаев.

Жаңа сома бекітілмесе не істеу керек?

Көптеген қалаларда жаңа минималды тариф әлі бекітілмеген. Кейбір жерлерде бұл сома екі-үш жыл бойы өзгеріссіз қалып отыр. Заң бойынша, егер маслихаттар тарифті бекітпесе, пәтер иелері жиналыс өткізіп, есептеу әдістемесіне сәйкес ағымдағы жарналар мөлшерін өздері бекіте алады. Бұл туралы «Тұрғын үй қатынастары туралы» Заңның 42-бабының 5-тармағының 7-тармақшасында айтылған.

Алайда, маслихаттардың неліктен тарифтерді уақтылы бекітпегені және бұл мәселенің қашан шешілетіні әлі белгісіз. Бұл сұрақтар бойынша тиісті әкімдіктерге сауал жолданды.