InfoHub Logo

Тақырып: Менің елім - Қазақстан

Мақсаты: балаларды отансүйгіштікке баулып, туған жерін, елін сүюге тәрбиелей отырып, еліне деген патриоттық сезімін ояту. Балаларды Қазақстан Республикасының рәміздері туралы білімдерін бекіту, құрметтеуге тәрбиелеу.
Әдіс - тәсілдері: Қазақстан Республикасы туралы әңгімелеу, тақпақтар көрсету, түсіндіру, сұрақ - жауап, сергіту сәті.
Көрнекіліктер: Қазақстан Республикасының рәміздерінің суреттері,

Демонстрациялық материалдар.
І. Кіріспе бөлім. Мотивациялық кезең.
Арайланып таң атты
Алтын сәуле таратты
Жарқырайды күніміз
Жарқырайды даламыз
Қайырлы таң достар
Қайырлы таң қонақтар

1. Жыл мезгілі:
1. Балалар қазір жылдың қай мезгілі?
2. Қыста ауа - райы қандай болады?
3. Қыс туралы кім тақпақ біледі?
4. Қыс мезгілінде қандай мерекелер болады?
Тәрбиеші: Балалар қыста ауа - райы суық, аяз болады, дала, айналаның барлығы ақ көрпе оранғандай аппақ болады.

Негізгі бөлім. Ұйымдастыру кезеңі. Енді балалар бүгінгі жаңа сабағымыз «Менің елім - Қазақстан».
- Балалар сендер қандай ауылда тұрасыңдар?
- Біз қандай мемлекетте тұрамыз?
- Қазақстан Республикасында тұрамыз.
- Отан дегенді қалай түсінесіңдер?
- Отан туралы мына өлеңді есімізге түсірейікші.
Отан - менің ата - анам,
Отан – досым, бауырым,
Отан – өлкем, Астанам,
Отан – туған ауылым.
Отан – тарих, Отан – тіл,
Жасаған елім, өз халқым.
Отан – өлең, Отан – жыр.
Көтерген көкке ел даңқын.
- Балалар көрдіңдер ме өлең жолдарында Отанды қандай жақсы сөздермен жеткізген. Отан сенің ата - анаң, Отан – туған жер, Отан – бұл Қазақстан Республикасы. Сондықтан біз Отанды жоғары бағалап, қадірлей білуіміз керек.
- Елбасымыз кім?
- Елбасымыз Нұрсұлтан Әбішұлы Назарбаев.
- Балалар айтыңдаршы Қазақстан Республикасының мемлекеттік рәміздерін білесіңдер ме? Кәне атайықшы.
- Ту, Елтаңба, Әнұран
- Ал, ендеше мемлекеттік рәміздер туралы тақпақ айтып беріңдерші?
1. Елтаңбасы елімнің
Ортасында шаңырақ.
Мемлекеттік туымнан
Күн шығып тұр жарқырап.
2. Әнұраны елімнің
Шақырады бірлікке.
Егеменді халқымның,
Болашағы бірлікте
3. Қазақстан – елім менің
Қазақстан – жерім менің,
Саған арнап айтылады
Әнім менің.
4. Он алтыншы желтоқсан –
Тәуелсіздік алған күн.
Ерекше боп мәңгілік,
Ел жадында қалған күн.

Дидактикалық ойын: «Өз түсіңді тап»,«Ойлан тап».
Мақсаты: Балаларға үш түрлі түстерді беріп, музыка ойнағанда араласып билеп, музыка тоқтағанда өз түстерін тауып тұра қалады.
Мақсаты: Балаларды үш топқа бөліп, үш бөлек үстелге тапсырмалар қойып, дұрыс орындауын қадағалау.

Сергіту сәті: Ұзын мұртты құмырсқа
Жолға шықты жұмысқа,
Қойдым допты жолына
Алды допты қолына
Оңға қарады,
Солға қарады,
Үлкен тау деп ойлады.

Қорытынды: «Менің елім - Қазақстан» тақырыбында өзіміздің еліміз Қазақстан туралы білдік. Қазақстан Республикасының мемлекеттік рәміздерімен таныстық.
Ойын: «Жылы сөздер» жылы сөздер айтып күн шуағын жапсыру.
Бүгінгі оқу іс - әрекетіміз сендерге ұнады ма? Барлықтарың өте жақсы қатыстыңдар.
- Ал енді, балалар, бәріміз қонақтармен қоштасайық.
Қол ұстасып тұрайық,
Шеңберді біз құрайық.
Көріскенше күн жақсы,
Cау-саламат болайық

Павлодар облысы, Ақсу ауданы,
Үштерек орта мектебі "Шағын орталық" тәрбиешісі
Авиты Женекуль