InfoHub Logo

Мереке күні әйелін аяусыз соққыға жығып, ауруханаға түсірген ер адамның әрекеті заңгер Айгүл Орынбекті қатты толғандырды. Ол бұл жағдайды әлеуметтік желіде жариялап, қоғам назарын аударып, тиісті шара қабылдауды талап етті.

Бұл туралы Infohub.kz ақпарат агенттігі хабарлайды.

Тұрмыстық зорлық-зомбылықтың кезекті құрбаны

Заңгердің айтуынша, мереке күні болған оқиға кезінде әйел күйеуінің соққысынан ауыр жарақат алып, Роща ауруханасына жеткізілген. Айгүл Орынбек бұл жағдайға қатты ашуланып, әйелдерге қатысты зорлық-зомбылықтың қоғамда әлі де өзекті екенін атап өтті.

Қоғамға үндеу

«Менің таңым кейде осылай басталады... Басқа елдерде мереке күні әйелдер гүл алып қуанып жатса, маған көмек сұрап хабарласады. Мына әйелді күйеуі дәл мереке күні аяусыз ұрып-соғып, ауруханаға түсіріпті. Зорлық-зомбылықсыз Қазақстан үшін күресіп жүрген нәзік жанды ретінде, Шымкент қаласының полициясынан осы іс бойынша заң аясында тиісті шара қабылдауларыңызды сұраймын. Өкінішке қарай, мереке күні гүл емес, жұдырық алып жатқан әйелдер де бар. Бұл — қоғам үшін өте ауыр шындық. Халықаралық мереке құтты болсын!» - деп жазды заңгер.

Айгүл Орынбек тұрмыстық зорлық-зомбылық мәселесіне бейжай қарамауға шақырып, мұндай жағдайлардың алдын алу үшін қоғам болып күресу қажеттігін жеткізді. Оның жазбасы әлеуметтік желіде қызу талқыланып, көпшіліктің қолдауына ие болды.