InfoHub Logo

Павлодар облысы Тереңкөл ауданында 2025 жылдың қыркүйегінде болған қайғылы оқиға бойынша жаңа деректер жарияланды.

Бұл туралы Infohub.kz ақпарат агенттігі хабарлайды.

Әкесі қызын өзінен емес деп күдіктенген

Тергеу нұсқасына сәйкес, 26 жастағы ер адамға қылмысқа баланың өзінен емес деп күдіктенуі себеп болған. Ол жұбайымен бірге екі бала тәрбиелеген: үш жасар қызы және 2025 жылдың мамырында туған ұлы. Алайда, ер адам қызын өзінен емес деп, әйелін опасыздық жасады деп ойлап, оған жүйелі түрде зорлық-зомбылық көрсете бастаған.

Қайғылы оқиғаның мән-жайы

Прокуратура мәліметінше, ер адам қызын түнде шарфпен төсекке байлап, үнемі ұрып-соғып отырған. Бұл әрекеттер бірнеше ай бойы, яғни қаңтардан қыркүйекке дейін жалғасқан.

Қайғылы оқиға болған күні күдікті көршісінің моншасында ішімдік ішкен. Кешкі уақытта үйіне келіп, қызын алып, бірнеше рет ұрған. Кейін қайтадан моншаға барып, ашу үстінде баланы көтеріп, бетон еденге лақтырып жіберген.

Салдары

Алған ауыр жарақаттардың салдарынан қыз аудандық ауруханада көз жұмды. Дәрігерлер бауырдың жыртылуы мен ішкі қан кетуді тіркеген.

Қылмыстық іс

Қазіргі уақытта ер адамға «Азаптау» және «Адам өлтіру» баптары бойынша айып тағылып отыр. Оған өмір бойына бас бостандығынан айыру жазасы қаупі төніп тұр. Айыпталушы өз кінәсін мойындамаған.