InfoHub Logo

Елімізде экологиялық жағдайды жақсартуға бағытталған «Таза Қазақстан» атты ауқымды акциясы басталды. Бұл бастаманы «Қазақмыс» корпорациясы да қолдап, өз жұмыс істейтін аймақтарында сенбіліктер өткізуді бастап кетті. Акция сәуірден мамыр айына дейін жалғасады.

Бұл туралы Infohub.kz ақпарат агенттігі хабарлайды.

Аймақтарды абаттандыру жұмыстары

«Қазақмыс» компаниясы тек өндірістік аумақтардағы тазалыққа ғана емес, сонымен қатар қала мен елді мекендерді көгалдандыруға да ерекше мән береді. Акция аясында компания қызметкерлері көшелерді, іргелес аумақтарды және қоғамдық орындарды тазалауға белсенді атсалысуда.

Ауқымды сенбіліктер

Сәуірдің 2-4 күндері аралығында Жезқазған, Қарағанды, Сәтбаев және Балқаш қалаларында ауқымды сенбіліктер ұйымдастырылды. Бұл шараларға «Қазақмыс» корпорациясы, Kazakhmys Smelting, Kazakhmys Maintenance Services, КЛМЗ, Kazakhmys Barlau, колледждер, ZhezAir, Жезқазған медициналық орталығы компанияларынан 1100-ден астам қызметкер қатысты. Жұмыстарға шамамен 100 бірлік арнайы техника жұмылдырылып, 95 тоннаға жуық қоқыс шығарылды.

Сенбіліктер барысында өндірістік аймақтардың маңайы, жол бойлары тазартылып, қоқыстар шығарылды. Сондай-ақ, көгалдандыру және ағаш отырғызу үшін топырақ дайындау жұмыстары да атқарылды. Арнайы техникалардың көмегімен ірі көлемді қалдықтарды шығару жұмыстары тиімді жүргізілді.

Экологиялық саясаттың бір бөлігі

«Таза Қазақстан» акциясына қатысу – бұл «Қазақмыс» компаниясының тұрақты экологиялық саясатының маңызды бөлігі. Жүйелі түрде өткізілетін сенбіліктер тек тазалықты сақтауға ғана емес, сонымен қатар қоршаған ортаға деген жауапкершілікті арттыруға бағытталған.