InfoHub Logo

Барлық мектептер оқулықтармен 25 тамызға дейін қамтамасыз етіледі, деп хабарлайды ҚР Білім және ғылым министрлігінің баспасөз қызметі хабарлады.

Министрліктің хабарлауынша, биыл бірінші сыныптың барлық оқушылары 5 күндік оқыту жүйесіне көшіріліп, жаңа бағдарламаның негізінде білім ала бастайды. Қалған сыныптар бес күндік оқу бағдарламасына 2019 жылға дейін кезең-кезеңімен көшіріледі.

Елдегі мектептерде білім берудің жаңартылған бағдарламасына кезең-кезеңмен көшу процесі аясында 1-сынып үшін жаңа оқулықтар жасалды. Оқулықтар бес баспада шығарылды:

«Алматы кітап баспасы» ЖШС - «Обучение грамоте», «Қазақ тілі» (орыс тілді мектептер үшін), «Русский язык» (қазақ тілді мектептер үшін), «Музыка»;

«Атамұра» Корпорациясы» ЖШС - «Сауат ашу», «Көркем еңбек»/«Художественный труд»;

«Мектеп» баспасы -  «Математика», «Жаратылыстану»/«Естествознание», «Дүниетану»/»Познание мира»;

«Бөбек» орталығы - «Өзін өзі тану»/«Самопознание»;

«Express Publishing» ЖШС - «Английский язык».

Жалпы, биыл қыркүйекте мектепке 380 265 бала бірінші сыныпқа барады.

Оқу жылының ұзақтығы мектепалды сыныптарда 32 аптаға, 1-сыныптарда - 33 аптаға, 2-11 сыныптарға - 34 аптаға созылады.

Сонымен қатар мектептегі демалыс мерзімдері де бекітілді. Күзі демалыс 7 күнге (31 қазан мен 6 қараша аралығында), қысқы 10 күнге (30 желтоқсаннан 8 қаңтарға дейін), көктемгі демалыс 13 күнге (21 наурыздан 2 сәуірге дейін) созылады.

Сонымен қатар мектепалды сыныптың және 1-сынып оқушылары 2017 жылдың 1 мен 7 ақпан аралығында 7 күн демалады.

Жазғы демалыстың мерзімі мен оның ұзақтығы ҚР БҒМ-нің 2016/2017 оқу жылының аяқталуы туралы бұйрығында көрсетілетін болады.

---