InfoHub Logo

Ресей қорғаныс министрі Андрей Белоусов Орталық Азияда өзге мемлекеттердің әскери қатынас орнатуына жол берілмеуі тиіс екенін мәлімдеді. Бұл туралы ол Бішкекте өткен Шанхай ынтымақтастық ұйымына мүше елдердің әскери ведомство басшыларының кездесуінде айтты.

Бұл туралы Infohub.kz ақпарат агенттігі хабарлайды.

Ресейдің алаңдаушылығы

«Орталық Азияда өңірден тыс мемлекеттердің әскери қатынас орнатуға және логистикалық міндеттерді жүзеге асыруға ұмтылуын мұқият қадағалап отырмыз. Мұны біз жол беруге болмайтын әрекет деп санаймыз», — деді Андрей Белоусов 28 сәуірде өткен кездесуде.

Өзбекстан мен Түркияның әскери ынтымақтастығы

Ресей қорғаныс министрінің бұл мәлімдемесі Өзбекстанның Түркиямен әскери ынтымақтастықты дамытуға қатысты ақпарат шыққаннан кейін жасалды. 23 сәуірде Өзбекстан президенті Шавкат Мирзиёев қорғаныс министрі Баходир Холмухамедовтің Түркиямен әскери ынтымақтастықты дамыту бағыттары туралы баяндамасын тыңдаған болатын. Бұл кездесуге Түркия Қарулы күштерінің жоғары лауазымды өкілі де қатысты.

Өзбекстан президентінің баспасөз қызметі таратқан ақпаратқа сәйкес, кездесуде әскери-техникалық ынтымақтастықтың қарқыны ерекше атап өтілді. Бұл ведомствоаралық байланыстарды кеңейту, бірлескен іс-шараларды ұйымдастыру және әскери мамандарды даярлау бағыттарын қамтыды. Сондай-ақ әскери саладағы серіктестікті одан әрі тереңдетуге деген уағдаластық нақтыланды.