InfoHub Logo

Сатпаев қаласындағы емханада медицина қызметкерлерінің жұмыс орнында той жасап, алкоголь ішкені туралы видео желіде тарап, қоғамда үлкен резонанс тудырды. Бұл жағдай наурыз мерекесі кезінде болған.

Бұл туралы Infohub.kz ақпарат агенттігі хабарлайды.

Жұмыс орнындағы той

Наурыз мерекесінің қарсаңында, яғни 21 наурызда емханада ресми түрде шара өткенімен, кешке қарай бір топ медицина қызметкері рұқсатсыз жұмыс орнында алкоголь ішіп, той жасаған. Бұл туралы журналист Михаил Козачковтың Telegram арнасында 11 сәуірде жарияланған видеодан кейін белгілі болды.

Науқастардың шағымы

Оқиға куәгерлерінің айтуынша, мереке күні емханаға келген науқастар кезекші қызметкерлердің мас күйде болғанын, олардан ішімдік иісі шығып, мінез-құлқы дөрекі болғанын айтқан. Бұл жағдай науқастар мен қызметкерлер арасында кикілжің тудырған.

Облыстық денсаулық сақтау басқармасының мәліметінше, кешкі мерекелік іс-шара әкімшіліктің рұқсатынсыз, қызметкерлердің жеке бастамасымен ұйымдастырылған.

Медицина қызметкерлеріне салған жаза

Басқарманың хабарлауынша, оқиғадан кейін дереу тексеру жүргізілген. Нәтижесінде, кезекші дәрігер жұмыстан босатылды. Емхана директорының міндетін атқарушы Э. Олжаева мен екі медбикеге қатаң сөгіс жарияланды. Емхана директоры Р. Нысанбаевтың тағдыры оның ауруханадан шыққаннан кейін тәртіптік кеңесте қаралатын болады.