InfoHub Logo

Ресейдің Санкт-Петербург қаласында Қазақстаннан шыққан азамат балаға оқ атқаны үшін ұсталып, тергеуге алынды. Оқиға салдарынан 11 жастағы жасөспірім ауруханаға жатқызылды.

Бұл туралы Infohub.kz ақпарат агенттігі хабарлайды.

Оқиғаның мән-жайы

Оқиға Декабристер көшесіндегі үйлердің бірінің маңында болған. Басылымның мәліметінше, бала үйдің терезесінің астында саксофонда ойнап жүрген. Бұл дыбыс 38 жастағы азаматты ашуландырған.

Ашуына шыдамаған ер адам пневматикалық тапаншасын алып, терезеден оқ жаудырған. Оқ баланың бетіне тиіп, иегіне тығылып қалған.

Жасөспірімнің жағдайы

Зардап шеккен бала ауруханаға жеткізіліп, қазіргі уақытта оның жағдайы орташа деп бағалануда.

Күдікті кім?

Басылымдардың хабарлауынша, ұсталған азамат – Қазақстан тумасы, Айтжан Смағұлов есімді азамат. Ол 2021 жылдың сәуір айынан бері Мариин театрында қосалқы труппаның мүшесі ретінде қызмет еткен.

Ресей Ішкі істер министрлігінің ресми өкілі Ирина Волк полицияға бейтаныс адамның баланы атып кеткені туралы хабарлама түскенін айтты. Министрліктің мәліметінше, күдікті баланың ойынын ұнатпай, оны «жазалау» үшін терезеден оқ атқан.

Қылмыстық іс қозғалды

Аталған дерек бойынша Қылмыстық кодекстің «Қару қолданып жасалған бұзақылық» бабымен қылмыстық іс қозғалды.