ۇستاز تۇلعاسى
ادامعا بيازىلىق، ادەپتىلىك جاراسقان. بىرەۋدىڭ بوساعاسىن اتتاردا بويىڭدى ىڭعايسىزدىق بيلەيدى، قىسىلاسىڭ. قالاي قارسى الادى، كىم شىعادى الدىڭنان؟ كۇندەگى ۇيرەنشىكتى تىرشىلىكتە، ءتىپتى كورشى مەن كورشىنىڭ اراسىنداعى قارىم-قاتىناستاردا وسىلاي بولادى.
ال مەكتەپ بوساعاسىن اتتاردا شە؟ جوق، ولاي ەمەس. سەن ەركىنسىڭ، سەن قىسىلمايسىڭ، ىنتىعا كەلەسىڭ بۇل بوساعاعا. ويتكەنى ساعان ءومىر ەسىگىن ايقارا اشاتىن ادام بار وندا. سول ادام بۇكىل عۇمىرىندا بولەكشە ىستىق. ەسەيىپ ەرجەتسەڭ دە، مارتەبەڭ قانشا وسسە دە، ول ادامنىڭ الدىندا الاساسىڭ، كىشىسىڭ، بالاسىڭ. ادامدار كوكىرەگىندە عۇمىر بويى وسىلايشا قۇرمەتكە بولەنگەن، ءومىر بويى ءپىر تۇتار ءبىر جان بولادى. ول — ۇستاز!
مەكتەپ — ۇرپاق — ۇستاز! وسى ۇعىمدار بىر-بىرىمەن بىرىككەن، تۇتاسقان. مەكتەپ — التىن بەسىك، ۇرپاق — كوعام بولاشاعى، ۇستاز — سونى دايارلاۋشى. بولاشاقتى دايارلاۋشى! بولاشاققا ارتار ءۇمىتتى ەڭ الدىمەن ۇستازدارعا ارتامىز. ءار سەميا ءازىنىڭ ارداقتى اسىلى، ءتاتتى ءۇمىتى - ءسابيىن، قوعامدا ەڭ سەنىمدى تىرەگى — بولاشاق قۇرىلىسشىلارىن ۇستاز قولىنا بەرەدى، اقاۋسىز ازامات شىعارادى دەپ سەنەدى.
ۇستاز پارىزى — ۇلكەن پارىز. ال بۇگىنگى ۇرپاققا ۇستاز بولۋ تىپتەن جاۋاپتى. ءبىر كەزدە بىزدەر تاڭ قالعان، تامسانعان، ارمان ەتكەن، دۇنيە ەندىگى ۇرپاققا ۇيرەنشىكتى بوپ كەتتى. بۇگىنگى بالا ءۇشىن تەليەۆيزور كۇندە كورىپ جۇرگەن جاي نارسەسى، «ءتۋ-ى04» سامولەتى شىعا سالا مىنە شاباتىن بەلدەۋدە تۇرعان اتى سەكىلدى، كوسموسقا ۇشۋ دا ەندى تاڭ بولماي قالدى.
وسى عاجايىپ وزگەرىستىڭ ءبارى قازىرگى ۇرپاقتىڭ كوز الدىندا ءوتىپ جاتىر. ول ءومىر ءسۇرىپ وتىرعان قوعام — جاسامپاز قوعام. بالاعا ءقازىر جاقسى نە، جامان نە ەكەنىن ۇيرەتىپ قويۋ جەتكىلىكسىز. ونى سابيلەر بالالار باقشاسىنان - اق ءبىلىپ شىعادى. ساۋات اشۋدى «ا» ءارپىن ۇيرەتۋدەن، ەسەپ شىعارۋدى «2+2=4» - تەن باستاۋ بارىمىزگە ۇيرەنشىكتى.
بۇل جىلدا قايتالانادى. سىرت قاراعاندا ءبىر جىلدىڭ ءبىر جىلعا ۇقساس سياقتى. كەيبىر مۇعالىمدەر دە سولاي دەپ ۇعادى. وسى جاي كەيدە ءبىزدى اداستىرادى. كەشەگى بالا مەن بۇگىنگى بالانىڭ اراسىنداعى ايىرماشىلىقتى ەلەتپەيدى.
ال شىن مانىندە، ءار جىلعى ۇرپاقتىڭ رۋحاني تانىسىنا ۇڭىلسەك، مۇلدە باسقاشا. بۇگىنگى وقۋشىلاردى بۇدان ون جىل بۇرىنعى وقۋشىلارمەن سالىستىرۋعا بولمايدى. بۇگىنگىنىڭ تالابى دا زور، تالعامى دا كۇشتى. ويتكەنى ولاردىڭ ورەسىن ءومىر كەڭەيتىپ وتىر. مۇنى ەسكەرمەگەن ۇستاز اقاۋ جىبەرەدى، ۇرپاق بويىنا شاق ءبىلىم بەرە المايدى.
مۇعالىمگە دە تۆورچەستۆولىق ءوسۋ قاجەت. ءومىر تالابىنا ونىڭ ورەسى ساي كەلمەسە قيىن. ساعاتىن عانا ساناپ، قارا باسىنىڭ قاۋىزىندا عانا جۇرەتىن ادام بۇگىنگى كۇننىڭ ءمۇعالىمى ەمەس. بالانى اسقاق ازاماتتىققا، ارلى بولۋعا كىم باۋليدى؟ ءوزى سونداي ءمۇعالىم عانا.
بالانى شىنشىلدىققا، ولكەسىن، ءوڭىرىن، وتانىن سۇيۋگە كىم ۇيرەتەدى؟ بويىندا سونداي قاسيەتتەر بار ءمۇعالىم عانا.
بالانى ارمانشىلدىققا، تاباندىلىققا كىم جەتەكتەيدى؟ ءوزى ارمانشىل، ءوزى تاباندى ءمۇعالىم عانا. وقۋشى ءبىلىمىن وتاننىڭ بەرىك سەنىمدىلىگىنە كىم اينالدىرادى؟ وتان مۇراتتارىنا ءوزى سەنگەن، سول جولدا ءوزىن كۇرەسكەر دەپ ەسەپتەيتىن ءمۇعالىم عانا.
سوندا ول اعارتۋشى، ساۋاتتاندىرۋشى عانا ەمەس، جاڭا تۇرپاتتى قوعام مۇشەسىن شىنداۋشى، وسى جولدا ەمشەك سۇتىنەن كەيىنگى جاۋاپكەرشىلىكتى وزىنە الۋشى. ءمۇعالىم ەڭبەگى قويعان باعا — ۇلگەرىممەن عانا ولشەنبەسە كەرەك. ەشبىر مالىمەتكە جازىلمايتىن، ەشبىر ستاتيستيكا كورسەتە الماس ءمۇعالىم ەڭبەگىنىڭ قىرى بار. ول — شاكىرتىنىڭ بويىنا قانداي ازاماتتىق اسىل قاسيەت دارىتا العاندىعى، رۋحاني نور ەككەندىگى.
ۇستازدىڭ تۆورچەستۆولىق تۇلعا ەكەنى وسىدان. پەداگوگ ماماندىعى ءۇشىن دە تالانت كەرەك. پەداگوگيكالىق جوعارى وقۋ ورىندارىنا دا ونەر ينستيتۋتىنا تالانتتاردى تانداپ الاتىنى سەكىلدى ۇستازدىق ەتۋگە تالانتى بارلاردى عانا قابىلداسا، قانداي جاقسى بولار ەدى. سوندا ءقازىر جاي عانا كوشكە ىلەسىپ، تاربيەنىڭ كوبىگىن عانا بەرىپ، ءسولىن دارىتا الماي جۇرگەندەرگە التىن بوساعا - مەكتەپ ەسىگى جابىق بولار ەدى.
مەكتەپ — ازاماتتىققا، ادامگەرشىلىككە باۋلۋدىڭ العاشقى باسپالداعى. وقۋشىلار وقۋ كەستەسىندە كورسەتىلمەگەن، اركىمگە قاجەت ۇلى ءبىر عىلىممەن تانىسۋدى وسىدان باستايدى. ول عىلىم ءبىر عانا ءبىلىم مولشەرىمەن ولشەنبەيدى، ادام بويىنداعى بۇكىل سەزىم تۇتاستىعىنان، قالىپتاسقان قاسيەتتەر قاراسىنان كورىنەدى. ول — وتاندى سۇيۋگە، سونىڭ لايىقتى ازاماتى بولىپ، ىستىق ماحابباتپەن ەڭبەك ەتۋگە باۋلۋ عىلىمى.
تاريحشىلار وتاننىڭ تاريحىن، تىلشىلەر سول ەلدىڭ سويلەيتىن ءتىلىن، گەوگرافتار تابيعاتىن ۇيرەتەدى دەيىك. ءبىراق ءار پەداگوگ، ءتىپتى، ول ەكى جەردە ەكىنىڭ ءتورت ەكەنىن ۇيرەتەتىن بولسا دا، شاكىرتىنىڭ جۇرەگىنە وتاندى ءسۇيۋ سەزىمىن ەگە ءبىلۋى كەرەك. مىنە، بۇل — ۇستاز تۇلعاسىن انىقتايتىن باستى كورسەتكىش.
ءبىزدىڭ رەسپۋبليكانىڭ تەك اۋىلدىق جەرلەرىندە عانا 95 مىڭ ءمۇعالىم بار. ولاردان 1 ميلليون 630 مىڭ وقۋشى ءتالىم الادى. ءسال ويلانىپ كورەيىكشى، ۇستازدىڭ قولىنا قانشاما ادامنىڭ تاعدىرى تاپسىرىلعان. بۇلار ءار اتا-انانىڭ ءۇمىتى، ءار وتباسىنىڭ كوزىنىڭ اعى مەن قاراسى.
ەڭ باستىسى — قوعامنىڭ ەرتەڭگى بولاشاعى. ۇستاز بولاشاق ءۇشىن كۇرەسكەر، كەلەشەگىمىزدى شىنداۋشى.
You Might Also Like
-
مەن اداممىن. يا، ءبىز ءبارىمىز دە ادامبىز. ءبىراق، وسى ءبىر ۇلى ەسىمنىڭ مانىنە امسە ۇڭىلە بىلەمىز بە، سونىڭ بار قاسيەتىن ءاردايىم ەستە ساقتاپ جۇرەمىز بە؟ ادام بولۋ ءۇشىن ەكى قول، ەكى اياقتىڭ، ەكى كوز، ەكى...
-
قانداي ءسوز ەستە قالادى تەگى؟ ارينە، ءنارلى ءسوز، ءدامدى ءسوز. پىكىرى بار، ويى بار، وتىرعان جۇرتتىڭ كوكەيىنەن شىققان سوزدەر عانا ءقادىرلى بولادى. ال ونداي ءسوزدى تولعانىپ، تولعاتىپ جۇرگەن ادام عانا ايتا ا...
