InfoHub Logo

Жер шары демографиялық өзгерістер алдында тұр. Біріккен Ұлттар Ұйымы сарапшыларының болжамы бойынша, 2050 жылға қарай Жер халқы 10 миллиардқа жуықтайды. Бұл жаһандық ресурстарға, инфрақұрылымға және денсаулық сақтау жүйесіне үлкен қысым көрсетіп, жаһандық дағдарыстарға әкелуі ықтимал.

Бұл туралы Infohub.kz ақпарат агенттігі хабарлайды.

Қазіргі таңда әлем халқының саны 8 миллиардтан асады. БҰҰ болжамы бойынша, алдағы 25 жылда бұл көрсеткіш тағы 2 миллиардқа артады. Мұндай қарқынды өсімге өмір сүру ұзақтығының артуы, урбанизация және көші-қонның көбеюі сияқты факторлар ықпал етеді. Бүгінде орташа өмір сүру ұзақтығы 73 жасты құраса, 25 жылдан кейін ол 77 жасқа жетуі мүмкін. Бұл егде жастағы адамдардың санының екі миллиардқа жетуіне әкелуі ықтимал.

Африка халқы 2050 жылға дейін екі есе артады

Сарапшылардың айтуынша, әлем халқының картасы тез өзгеруде. Қазіргі таңда демографиялық өсімнің негізгі үлесі табысы төмен аймақтарға ауысып отыр. Болжам бойынша, 2050 жылға қарай Африка халқы екі есе артады. Ал әлемдегі ең көп халық саны бар Үндістан мен Қытай әртүрлі бағытта дамуда. Қытай Халық Республикасының халқы азая беретіні болжанса, Үндістан бірнеше онжылдық бойы өсімді көрсетеді.

Еуропада халық санының азаюы

Еуропада керісінше үрдіс байқалады. Сарапшылардың болжамы бойынша, 2050 жылға қарай 26 елде халық саны орта есеппен 15%-ға азаяды. Олардың қатарында Болгария, Босния және Герцеговина, Венгрия, Латвия, Хорватия бар. Қазіргі таңда Еуропа елдеріндегі туу көрсеткіші әйел басына шаққанда 2 баладан төмен. Сарапшылардың айтуынша, көптеген отбасылар үшін бала туу – елеулі қаржылық қиындыққа айналған.

Швейцарияда халық санына шектеу қою туралы референдум

Швейцарияда халық санының өсуін тежеу мақсатында нақты шаралар қабылдануда. 14 маусымда елде жалпыұлттық референдум өтеді. Тұрғындар халық санын 10 миллионмен шектеу туралы ұсыныс бойынша дауыс береді. Егер халық саны 9,5 миллионға жетсе, билік миграциялық саясатты қатайтып, тіпті Еуропа Одағымен еркін жүру туралы келісімді бұзуға міндеттеледі. Азаматтардың наразылығына жолдардың толысуы, мектептерде орынның жетіспеушілігі және тұрғын үй тапшылығы себеп болған.

Сарапшылардың пікірінше, планета халқының одан әрі өсуі табиғи ресурстарға, инфрақұрылымға және денсаулық сақтау жүйесіне ауыр салмақ түсіріп, жаһандық дағдарыстарға әкелуі мүмкін.