InfoHub Logo

Атырау облысында Алтын Орда дәуірінен сыр шертетін Ақтөбе-Лаэти қалашығы ашық аспан астындағы мұражайға айналады. Бұл бастама облыс әкімінің тапсырмасымен қолға алынып, биылғы жылдың соңына дейін аяқталуы тиіс.

Бұл туралы Infohub.kz ақпарат агенттігі хабарлайды.

Жоба аясында кіреберіс маңында әкімшілік ғимараты салынып, 2018-2019 жылдары жүргізілген археологиялық қазбалар кезінде табылған тарихи нысандарда ғылыми-реставрациялық жұмыстар атқарылады. Ескерткіштерді сақтау үшін олардың үстіне арнайы қорғаныш құрылымдары орнатылады.

Туристерге арналған нысандар

Аумақта туристер мен жастарды тарту мақсатында абаттандыру жұмыстары жүргізіліп, садақ ату алаңы да салынады. Бұл қалашық Алтын Орда дәуіріндегі ірі қолөнер және сауда орталықтарының бірі болған. Сондықтан бұл жоба тек бір нысанды жаңартып қана қоймай, тұтас тарихи кезеңнің келбетін қалпына келтіруге бағытталған.

Тарихи маңыздылығы

Тарихи-мәдени мұраны зерттеу орталығының басшысы Толыбай Достыбаевтың айтуынша, Ақтөбе-Лаэти ескерткіші ата-бабамыздың тұрмыс-тіршілігін, экономикалық және мәдени байланыстарын айқын көрсететін бірегей мұра болып табылады. Оны сақтай отырып, жас ұрпаққа өткеннің бай мұрасын жеткіземіз және өңіріміздің тарихи маңыздылығын айшықтаймыз.

Ақтөбе-Лаэти қалашығы 13-15 ғасырларға жатады. Ол Атырау қаласына қарасты Томарлы ауылынан шығысқа қарай екі шақырымдай жерде орналасқан. Бұл нысан Алтын Орда дәуірінің маңызды ескерткіштерінің бірі саналады.

2024 жылы жалпы аумағы 52,7 гектарды құрайтын қалашық аумары толық қоршалып, оған 74,3 миллион теңге жұмсалды. Периметрінің ұзындығы – 2935 метр.

Бұған дейін 2024 жылы Ақтөбе-Лаэти қалашығы орнында мұражай мен павильон салынатыны хабарланған болатын. Келісімшарт құны 606 миллион 320 мың теңгені құрады. Алайда, құжаттама банк рәсімдерінен өтпей, келісімшарт бұзылып, жоба 2026 жылға арналған іс-шаралар жоспарына қаржыландыруы расталмай енгізілді.