InfoHub Logo

1 шілдеден бастап Қазақстанда электр самокаттарын пайдалануға қатысты жаңа ережелер қолданысқа енгізіледі. Ішкі істер министрлігінің хабарлауынша, бұл өзгерістер негізінен жалға берілетін самокаттарға қатысты болады. Жеке электр самокаттарының иелеріне әзірге міндетті тіркеу немесе нөмір белгілеу талап етілмейді.

Бұл туралы Infohub.kz ақпарат агенттігі хабарлайды.

Жалға берілетін самокаттарға қойылатын талаптар

Жаңа ережелер бойынша, жалға берілетін электр самокаттар міндетті түрде азаматтық-құқықтық жауапкершілікті сақтандыру шартымен қамтамасыз етілуі тиіс. Бұл шара жол-көлік оқиғалары кезінде келтірілген залалды өтеуді қамтамасыз ету мақсатында енгізіліп отыр.

Министрліктің мәліметінше, сақтандыру полисі мен белгіленген үлгідегі тіркеу нөмірі бар жалға берілетін самокаттар ғана жол қозғалысына қатыса алады.

Кикшеринг компанияларына қосымша міндеттер

Сақтандыру мен нөмір белгілеуден бөлек, кикшеринг компанияларына қосымша жауапкершіліктер жүктеледі. Олар самокаттарды есепке алуы, техникалық жағдайын бақылауы, жылдамдықты шектеуі, құрылғылардың орналасқан жерін қадағалауы, жол ережесін бұзудың алдын алуы және деректерді ішкі істер органдарына беруі керек.

Жеке самокат иелеріне қатысты жағдай

Ішкі істер министрлігі жеке тұлғаларға тиесілі электр самокаттарына бұл талаптардың қолданылмайтынын нақтылады. Қазіргі уақытта олар үшін міндетті тіркеу немесе нөмір алу қарастырылмаған.

Алайда, жеке самокат иесі көлік жолына шықса, жол ережесін сақтауға және жүргізуші куәлігін ұстауға міндетті болады.

Естеріңізге сала кетейік, 1 шілдеден бастап жаңа нормалар күшіне енеді. Атап айтқанда, Әкімшілік құқық бұзушылық кодексінің 619-2-бабы енгізіліп, жалға беру қызметтерінің 18 жасқа толмаған немесе жүргізуші куәлігі жоқ тұлғаларға самокат бергені үшін 108 125-тен 173 000 теңгеге дейін айыппұл төлеуі қарастырылған.