InfoHub Logo

Қостанай облысы Әулиекөл ауданы
№121 Құсмұрын орта мектебі
9-А сынып оқушысы Гилязитдинова Наталья
Жетекшісі: қазақ тілі мен әдебиеті пәнінің мұғалімі Жантілесова Мадина Хамзақызы

«Ұстаздық еткен жалықпас, үйретуден балаға» деп Абай атамыз айтқандай, ұстаз еңбегінің қыр-сыры мол. Бұл  қиын да жауапты, шығармашылық еңбек екендігін баршамыз мойындаймыз. Сондықтан мен үшін мұғалім – ең мәртебелі, құрметке лайық мамандық.

Менің түсінігімдегі  мұғалім – рухы таза, ой – өрісі биік, ұлты мен Отанының болашағы үшін тер төгіп, шыдамдылық пен та­бандылықтың үлгісін көрсетуші, жа­ңа­шылдықтың бастаушысы, жү­ре­гі – жылы, көңілі – дарқан адам.

Барлық ұлы адамдар мұғалім алдынан өткен, білім алған, үлгі-өнеге көрген. Олардың бәрі ұстаз алдына бас иген. Ұстаздар шәкірттерге туған баласындай қарап, ақыл айтып, білім нәрімен сусындатып, оңы мен солын танытады. Әр баланың көңілін тауып, жағдайын жасап, қамқорлық  көрсетеді. Балалар мұғаліміне зор құрметпен қарап, өзінің ішкі сырларымен ашық бөліседі. Ұстаз жеке уақытын аямай, барлық білімін, жан-дүниесін, мейірімін оқушыларға береді. Тіпті өмірден өз орнын табуға да көмектеседі.

Мектеп қабырғасында біз көптеген пәндерді оқимыз. Мен үшін ең маңызды пән – қазақ тілі. Қазақ халқы талай жылдар бойы аңсаған тәуелсіздігіне қол жеткізгенінен бері көптеген армандар орындалды. Соның жарқын көрінісінің бірі біздің елде мемлекеттік тіл - қазақ тілі.

Мен – Гилязитдинова Наталья, қасиетті Әулиекөл ауданының атақты ғалым Шоқан Уәлихановтың туған жерінің тумасымын. Ұлтым татар болса да, жүрегім үнемі «қазақ» деп соғады. Мен оқитын тоғызыншы сыныбым көп ұлтты, бірақ бәріміз өте татумыз, әрқашан бір-бірімізге қол ұшын созамыз.

Мемлекеттік тілді жақсы деңгейде меңгеруім қазақ тілінен сабақ беретін мұғалімім - Мадина Хамзақызының еңбегі деп білемін. Ол бізге қазақ тілін бірінші сыныптан беріп келе жатыр. Оқушыларына үнемі ақыл айтып, жөн сілтеп отырған ұстазымыздың сөзі біз үшін алтыннан да бағалы .  

Мүмкін сондықтан мұғаліміме еліктеп, соған қатты ұқсағым келіп, мен  келешекте жоғары оқу орнына түсіп, қазақ тілі пәнінің маманы болуды армандаймын. Жоғары оқу орнын аяқтап, өз ауылыма оралып, кішкентай бүлдіршіндерді қазақша оқытқым келеді. Мұратыма қол жеткізу жолында өзіме қазақ тілінде жетік сөйлеу деген мақсат қойдым. Бос уақытымда қазақша әндерді шырқауды, өлеңдерді жатқа айтуды, әдеби шығармаларды оқуды ұнатамын. Сүйікті ақын- жазушыларым -  Мұқағали Мақатаев, Сәкен Сейфуллин, Мұхтар Әуезов, Қалқаман Сарин.

Жазда мемлекеттік тілді жақсы білетін,  үздік оқушыларға арналған демалыс орнына бардым. Бірнеше жыл бойы қазақ тілі пәні бойынша республикалық олимпиада, байқау, сайыстарға үнемі қатысамын. Биылғы жылдың қыркүйек айында Қостанай қаласына барып, «Мың бала» байқауына қатыстым. Жеңіске жетпесем де, байқаудан қанаттанып келдім. Өйткені жаңа достарыммен танысып, олармен қазақ тілінде  сөйлесіп, ерекше сезімдерге бөлендім. Желтоқсан айында аудан бойынша пәндік олимпиаданың бас жүлде иегері атандым. Осындай жетістіктеріммен мемлекеттік тілдің өркендеуіне шағын болса да, үлесімді қостым.

Мемлекеттік тіліне деген құрметім қазақ халқына деген құрметім деп түсінемін. Қазақстанда тұратын өзге ұлт өкілдері қазақ халқының мәдениетін, тарихын, әдебиетін, тілін білуге міндетті деген сөздермен ойымды аяқтағым келеді.

---