InfoHub Logo

Орал қаласында Уәли Еламанов атындағы жас десантшылар әскери-патриоттық клубы ашылды. Бұл бастаманы ауған соғысының ардагерлері қолдап, жергілікті билік пен әскери-техникалық мектептің қолдауымен жүзеге асты.

Бұл туралы Infohub.kz ақпарат агенттігі хабарлайды.

Жас сарбаздар Отанға ант берді

Клубта қазіргі таңда 14-16 жас аралығындағы 28 жасөспірім тәрбиеленуде. Олар әскери пәндерді, қолданбалы жауынгерлік дайындықты, жекпе-жек өнерінің негіздерін және парашют спортының қыр-сырын меңгеруде. Тәрбиешілер оқу процесінің қызықты әрі тартымды болуына ерекше мән береді.

Тегін білім және патриоттық тәрбие

Марлен Иманғалиев, ауған соғысы ардагерлері одағының төрағасы: «Балалар тегін білім алады. Олар аптaның сейсенбі, сәрсенбі, бейсенбі күндері екі сағаттан, яғни сағат 16:00-ден 18:00-ге дейін дайындалады. Біз ешкімге кедергі келтірмейміз. Олар өз сабақтарын оқып, қосымша конкурстарға қатыса алады. Бос уақыттарында біздің шараларға да атсалысады».

Клубтың бағдарламасына патриоттық тәрбие жұмыстары да кіреді. Жасөспірімдер тарихты зерделеп, белгілі офицерлердің өмірбаянымен танысады. Клубқа Батыс Қазақстан облысының тумасы, Қазақстан Қарулы Күштерінің қалыптасуына елеулі үлес қосқан десантшы, генерал-майор Уәли Еламановтың есімі берілді. Бұл – белгілі жерлесімізге деген құрмет пен өлке тарихына деген тағзым.

Ұрпақтар сабақтастығы – болашақтың кепілі

Уәли Еламановтың ұлы Қайрат Еламанов: «Бұл клубтың жас ұрпақты дайындап жатқанына, десантшы рухын, патриотизмді, Отанға деген сүйіспеншілікті сіңіріп жатқанына өте ризамыз. Бұл – әкем ұстанған өмірлік қағидаттар болатын. Сондықтан бүгінгі күн біз үшін үлкен мереке»,- деп қуанышын жеткізді.

Жасөспірімдермен жұмыс істеу арқылы армияға деген сенім қалыптасады. Ұйымдастырушылардың пікірінше, ұрпақтар сабақтастығы арқылы еліміздің батырлыққа толы өткеніне лайықты болашағымыз қалыптасады.