InfoHub Logo

Қазақстандық Instagram желісінде дәрігерлердің мемлекеттік ауруханалардағы нақты жалақысы талқылау тудырды. Терапевт Анель Құрманова өзінің табыс парағын жариялап, медиктердің жағдайын баяндады.

Бұл туралы Infohub.kz ақпарат агенттігі хабарлайды.

Дәрігер алдымен желі қолданушыларынан Қазақстандағы дәрігерлердің қанша табыс табатыны туралы болжамдарын сұраған. Жауаптар әртүрлі болғанымен, кейбірі тіпті миллион теңгеге дейін жетті.

Ашық көрсетілген жалақы

Анель Құрманова 10 жыл білім алып, 5 жылдан астам тәжірибесі бар маман. Ол наурыз айында алған жалақысының есепшотын көрсетті. Ондағы сома – небәрі 242 мың теңге.

«Мен бұған 10 жыл білім алдым. Осы ақшаға қалай өмір сүруге болады? Отбасымды, балаларымды, өзімді қалай асыраймын?» – деп күйінді дәрігер.

Тәжірибелі мамандардың жалақысы

Желідегі кейбір пікірлерде мұндай аз жалақының себебі – жас маман болуы мүмкін деген ой айтылды. Алайда, Анель Қазақстанда 5-тен 30 жылға дейін жұмыс істеген әріптестерінен де жалақыларын сұрағанда, нәтиже онша өзгермеген. Орташа есеппен олардың табысы 270-350 мың теңге аралығында екені белгілі болды.

Дәрігерлердің әлеуметтік жағдайы

Дәрігердің айтуынша, толық жұмыс күні істесе де, жалақысы тек негізгі шығындарға ғана жетеді. Тұрғын үй жалдау, азық-түлік, көлік және басқа да міндетті төлемдерді өтегеннен кейін ақша қалмайды.

«Медик лайықты еңбекақы алғанда, ақша жайлы үнемі ойланбайды. Ең болмағанда негізгі қажеттіліктері қамтамасыз етілсе, ол жұмысына шоғырланып, өз ісін сүйіп, дамып, біліктілігін арттырар еді. Ал, кешіріңіз, тамаққа ақша жетпейтін болса, қалай болады? Не туралы ойлау керек?» – деп сұрақ қояды терапевт.

Бұл мәселе Қазақстан медицинасындағы кадр тапшылығына байланысты ерекше резонанс тудыруда. Жуырда Kursiv жариялаған мақалада денсаулық сақтау саласындағы барлық мамандықтар арасында дәрігерлер тапшылығы ең жоғары екені айтылған болатын.