InfoHub Logo

Men Gúljaýhardy qarshadaıynan bilip, qatty baǵalaımyn. Adal sút emgen perzent. Aq besik kórgen sábı. Kıeli tabaldyryqtan oń aıaǵymen attap kirgen qadirli kelin. Súıikti jar. Aıaly ana. Áldıinen peıishtiń úni, perishteniń demi seziler áz Áje.

Onyń óleńderinen qazaq qyzynyń ne bir qasıeti men kemel jan-dúnıesi kórinedi. Sabyrymen, sanasymen, sezimimen, tózimimen baýraıdy.

Shyn aqyn — óz júreginiń ǵana hatshysy. Ol óz júreginen shyqpaǵan sóz aıtpaıdy. Óz seziminiń eleginen ótkizbeı, lebiz bildirmeıdi. Óz parasatynyń tarazysyna salmaı, basqanyń sanasyn sandaltyp, aqylyn abyrjytpaıdy.

Bul — adamdarǵa degen sheksiz qurmet. Óreli azamat ózin de ózgelerdi qurmettegendikten syılaıdy. Adam abyroıy tógilmesin, azamat aty alasarmasyn degender ǵana adal ómir súredi. Shyn jylap, shyn kúledi.

Onyń kórgen jaryǵynyń bári adamǵa degen izet pen súıinishti, alǵys pen qurmetti kóbeıe túser erlik pen izgilikke toly. Ol ózgelerden bas asyryp, baq ozdyrý úshin emes, ómirdiń qadyryn jiti uǵyp, jete baǵalaǵandyqtan ójet armandarǵa beriledi.

Bar bol, nar bol, quba jonnyń qulanıek tańyndaı nurly sezimder jyrshysy.

Jaza ber, jaza tús, jaqsylyqpen jarastyq jarshysy!

Aǵalyq qurmetpen, qalamdastyq tileýlestikpen Ábish Kekilbaıuly

* * *

Sizge óńirdiń áleýmettik-ekonomıkalyq problemalaryn, azamattyq qoǵamdy nyǵaıtý jáne aımaqtyń munaıshylaryn shyǵarmalaryńyzǵa arqaý etken eńbegińizdi joǵary baǵalaı otyryp, shynaıy alǵysymdy bildiremin.

Sizge myqty densaýlyq, otbasyńyzǵa amandyq jáne shyǵarmashylyq tabystar tileımin.

Qyrymbek Kósherbaev

Mańǵystaý Oblysynyń Ákimi

* * *

Oılap otyrsam, meniń Gúljaýharmen tanysqanyma da otyz jyldyń ústine shyǵyp ketipti. Ol jyldary Aqtaý (Shevchenko) qalasynda "Bolshaıa zemlá — malaıa zemlá" degen sózder jıi estiletin. Bul únemi tarazynyń jeńildeý jaǵynda júretinbiz.

Reseı men Máskeý "Bolshaıa zemlá" dep atalatyn. Ózge ult ókilderinen óktemdiktiń lebin de sezetinbiz. Ol kezde qazaq tiliniń máselesi, qazaq tilinde oqytatyn mektepter men balabaqshalardyń tapshylyǵy, qazaq mádenıetin nasıhattaý jaıy syn kótermeıtin. Aqtaý qalalyq qazaq tili qoǵamyna jas, jigerli kelinshek Gúljaýhar Seıitjanova keldi. Alǵashqy qatysqan jınalystarynyń ózinde onyń aıqyn batyl usynystary, máselen sheber qoıa bilýi qala basshylaryn oılantyp, oń ózgeristerge túrtki boldy. Sóıtip, Aqtaý qalasynda qazaq tilinde oqytatyn mektepter, ne synyptar, balabaqshalarda qazaq tilinde jumys isteıtin toptar paıda bola bastady. Synnyń qamshysy qatty batqandar úıge keshti qurym, mezgilsiz ýaqytta zvandap úreı týǵyzýǵa da talaptanyp kórdi. Biraq olarynan esh nárse shyqpady. Talap barǵan saıyn kúsheıe berdi. Gúljaýhar on jylǵa jýyq osy qoǵamda jumys jasaǵanda "qazaq tili" uıymdarynyń bedeli ósip, óndiris, uıym basshylary onymen sanasatyn dárejege jetti.

Men biletin jerde Gúljaýhardy oıy ushqyr, qalamy úshkir jazýshy, aqyn retinde tanımyn.

Qazaqstan jazýshylar odaǵynyń múshesi degen ata qol zamanda Qazaqstannyń batys oblystarynda qyz-kelinshekter arasynda sırek kezdesetin, ol bul uıymnyń jaı qatardaǵy múshesi bolyp qoımaı, 9 kitap jazǵan belsendi múshesi bola da bildi.

Respýblıka munaıshy qaýymy jaqsy biletin tulǵa Rahmet Ótesinovtiń ómiri qaıǵyly da qaısarlyq úlgisi. Onyń ómiri týraly jazylǵan Gúljaýhardyń dastany jastarǵa úlgi bolarlyq týyndy.

Qazirgi qazaq halqynyń án óneriniń jaryq juldyzdarynyń biri Tamara týraly jazylǵan dastany da kisi janyn tolqytady.

Búgin Gúljaýhardyń mereı toıy qarsańyndaǵy tilegimiz — qalamyń talmasyn, jaqyn adamdardyń jan jylýyna bólene ber qaısar da, qaıtpas aqyn qaryndasym.

Ómirzaq Ozǵanbaev

* * *

Gúljaýhar Nursapaqyzy!

Sizdiń shyǵarmashylyq jolyndaǵy jetistikterińiz kópshiliktiń kóz aldynda ótip, sanasynda saqtaldy. Tóńiregińizge shýaq shashyp, talaı qyrdan asyp, jarqyn iz basyp kele jatqan tulǵańyz tuǵyrly, kisilik pen kishipeıildik sonyń aıǵaǵy bolyp keledi. Sizdiń jeńisti eńbegińiz, joǵary kásibı sheberligińiz, kókeıtesti máselelerdi oqyrmanǵa jetkizýge qosqan jeke úlesińiz úshin alǵys bildiremin.

Aqtaý qalasynyń ákimi

Sálimgereı Bekbergenov

* * *

Sizdi Mańǵystaý eliniń jurtshylyǵy tabıǵaty qytymyrlaý ór ólkege qanatymen sý seýip, beımálim shalǵaılardan aq jańbyryn alyp kelgen qarlyǵashqa balaıdy, aıaǵy qutty aq kelinimiz, asyl jeńgemiz dep aıalaıdy. Bul kúnde adamı baqytty Mańǵystaý jerinen tapqan jan, aımaqtyń aı mańdaı aqyny bolyp búgingi bıigińizge shyǵyp otyrsyz.

Mańǵystaý eli sizden jańa jyr jaýharlaryn kútedi. Sizge myqty densaýlyq uzaq ǵumyr, shańyraǵyńyzǵa shattyq qut-bereke tileıdi.

Edil Jańbyrshın

"Nur Otan" HDP Mańǵystaý

oblystyq fılıaly tóraǵasynyń

birinshi orynbasary

* * *

Ózińizdi munaıshylar ómirin óleń tilinde óreli teńeý, zerdeli zertteýlermen órnekteı bilgen sanaýly aqyndardyń biri dep bilemiz. Qalamyńyzdan kóptegen munaıshylaryń ónegeli ómir joldary ocherk, óleńderge ózek bolyp, olardyń el dáýletin eseleýdegi eńbekteri oqyrmandarǵa ónege retinde usynyldy. Abzal jaryńyz, belgili jýrnalıs Jolaman inimiz ekeýińiz úlgili otbasy retinde de belgilisizder. Aqyn bolýmen qatar Mańǵystaýǵa ıbaly, sándi de symbatty kelin de bola bildińiz. Zor densaýlyq mol baqyt tileımin.

Saǵyn Qyrymqulov

"Mańǵystaýmunaıgaz " AQ Bas dırektory

* * *

Siz belgili aqyn, qalamy júırik jazýshy ǵana emes, izdenimpaz, zerdeli zertteýshi eńbekqor jýrnalıssiz. Oǵan sizdiń 2000-jyldary Ózendik Munaıshylar, Ózen ken orny jaıly, jazǵan "Jańaózen ottary" atty eńbegińiz kýá. Ózendik Munaıshylarǵa arnap shyǵarǵan óleńderińiz dálel. Sondyqtanda sizdi munaıshylardyń jyrshysy, jarshysy dep bilip, árqashan rıza bolyp júremiz. Sol úshin de sizge zor densaýlyq shyǵarmashylyq tabys tileımiz.

Jalǵas Babahanov

Jańaózen qalasynyń ákimi,

Murat Qurbanbaev

«Ózenmunaıgaz» óndiristik

fılıalynyń dırektory.

* * *

Sen bizdiń kýrstaǵy eń aqyldy da, tárbıeli, talantty qyz boldyń. Sony basqalardan buryn baıqaǵan jigit sultany Jókeń seni Mańǵystaýǵa alyp ketti. Baqyt baıraǵy jelbiregen aq otaý qurdyńyzdar.

Alla súıgen qulyn synap alatyny belgili. Sizderge de solaı boldy. Shúkir, tula boıy tuńǵyshtaryń Janar keldi ómirge. Ol otaý kóterdi. Nemereli boldyńyzdar. Jolamannyń joly boldy. El arasynda abyroıǵa ıe. Baspasózdi, tele radıony basqardy. Gúleke sen qaıratker boldyń. Jyr, áńgime kitaptaryń shyqty.. Ánderiń shyrqalyp júr. Sen kúresker, qaısar anasyń. Sizderdi jaqsy kóremin. Qurmet tutamyn. Maqtan etemin. Jókeń ekeýińizdiń shańyraqtaryńyzdyń tóbesinde jelbiregen baqyt baıraǵy baıandy bolsyn!

Smaǵul Elýbaı

* * *

Júrek qalaýyń Jókeńmen birge jup jazbaı ómir keship, urpaq ósirip, oshaǵyń men Otanyńa jyr syılap, aınalańa shapaǵatty nur syılap keshken ómirleriń uzaǵynan bolǵaı. Jókeń, Janaryń nemereleriń shýaǵyń bolsyn, jyryń — bulaǵyń bolsyn!

Qutty bolsyn!.. Betińnen súıemiz!

Jaqaý, Baqqoja, Sultanáli

* * *

Sen júrgende kóz aldymda qyz-elik,
Kókiregimniń ketetuǵyn muzy erip.
Bir-birine súıenish bop órlegen
bir aǵashtyń qos butaǵy biz edik.
Jas edik-aý kógimizden kún kúlgen,
Eseıdik te qanat qaqtyq bir-birden.
San taraý jol alystatyp áketti
Saǵynysh bop qalaryńdy kim bilgen?
Uzaq bolǵaı kórer kúniń jaryǵyń,
Báıtereksiń tereń tartqan tamyryn.
Jalǵyz ǵana tilegi bar aǵańnyń —
Qaıǵy muńnan saqtasynshy táńirim!
Ómirińniń este qalar erekshe kúni – týǵan kúniń oraı qudaıdan qýat, otbasyńa amandyq , shyǵarmashylyq tabys tileımin!

Zufar Seıitjanuly.

* * *

Aıdyń kózi nurlanyp edi, —
Tún shekpenin zerledi.
Qalyń qorym tur nalyp áli,
Qarataýym da sherli edi.
Kúmis tańdaı, pák samaldyń
Syńǵyrlaıdy kúlkisi.
Adam-arman, qaptaǵan muń,
Ómir-qyrdyń túlkisi.
Kókke jaıyp alaqanyn
Kóktem de ótti buldyrap.
Kól betinde balapanym,
Kógildirler júr jylap.
Aqyn jany úlbirektep,
Kóshti sosyn munar bop.
Kún dıdaryn gúl kúzetpek,
Tún kózine tumar bop.
Tún janary jymyńdaıdy,
Túrip kóldiń etegin.
Sátti kútken bir yńǵaıly
Kórdiń be, ómir bekerin?
Ótken kúnniń belesinen
Jetti daýys, qaldy uzaq
Balbal tastaı elesimen
Qol bulǵaıdy jalǵyz-aq
Jaz-japyraq qys-qyraý ma?
Kúz — kóldiń tunbasy.
Kúıle, kóńil, tús buraýǵa!
Jyrdyń tamyp tur jasy.
Sertshil ediń sezinbediń be?
Arý aqyn symbattym.
Menshe ómirden bezindiń be?
Bil ony da, qymbattym!
Molda torǵaı tilekshim-aý,
Saýmal saǵym-besigim!
Óleń órtim júrek — mynaý
Súıdik ony nesi min?!
Gúljaýhary — Qyzǵaldaq-ty
Jyr jaýhary únsizdik.
Tún ǵashyǵyń syrǵańdy apty,
İz qalsyn dep bir sizdik
Qolań shashyn taraqtap ap,
Shaqyrdy sol tylsymym.
Sen be eken dep qarap-qarap,
Ketti ishimde bir syrym.
Meıir qatyp, nur ishken be,
Alaýly shaq aryndym?
Ketti taǵy myń ispen de
Tek baıaǵy Sabyrmyn!
Lebizimdi kútkeniń be,
Jeńgem qarap jolyma?
Ómir me? Ómir. Túk te múlde
Ózgergen joq soryma!
Baq degeniń — sol álgide
Ýy eken ǵoı, óleńniń!
Jan tonaldy, bálem, mine
Taǵysyn ba?..
Taǵy sosyn kórermin.
Qaýyrsyny qan-qan bolǵan óleńmin!..

Qurmetpen, qaınyńyz Sabyr Adaı.

* * *

Qurmetti Gúljaýhar!

Qazan aıynyń búgingi shyraıly kúni Sizdi júrekte hattalǵan órnek, bederi, shýaǵy mol mereıtoıyńyzben shyn peıilden quttyqtaımyz.

Siz erjetip osy eseıgen shaqqa deıin mándi de sándi ári ónegeli ǵumyr keship kelesiz. Beıneti kóp shyǵarmashylyq eńbekti serik etken jyldar ishinde jýrnalısik týyndylaryńyz oqyrmandardyń, jaýhar jyrlaryńyz óner súıer qaýymnyń júregine jol tapty. Halyqtyń qurmetine bólendińiz. Biz, áriptesterińiz, mereıińizdiń árdaıym, osylaısha, ústem bolýyna tilektespiz. Búgingi qýanyshyńyzdy bólise otyryp, Sizge alǵa qaraı da dúnıeniń bar jaqsylyǵyn, eń aldymen, myqty densaýlyq, shalqar shabyt, muqalmas jiger, otbasyna baq-bereke tileımiz.

Oblystyq "Mańǵystaý" gazetiniń ujymy

* * *

Sen óziń jyrǵa qosqandaı uly Abaı eliniń asyl qyzy, Adaı eliniń ardaqty kelini bola bildiń.

Ol abyroı, qurmet adal eńbegiń men adamgershilikke toly asyl qasıetterińmen, aqyl-parasat, qaısarlyǵyńmen keldi. Óte jaqyn týystyqpen jıi aralastyq. Bizder jaıly eń kóp jazǵan da ózińsiń. Alla rıza bolsyn. Baqyt tileımiz.

Jaqsylyq — Jumaǵaısha

---