InfoHub Logo

Ақтаудағы мұз сарайының құрылысы қала әкімдігі бекіткен жобадан әрі аспай, жергілікті аңызға айналды. 2018 жылы мемлекеттік-жекеменшік әріптестік аясында басталған құрылыс, кейіннен ірі сыбайлас жемқорлық жанжалына ұласып, сот арқылы тоқтатылды.

Бұл туралы Infohub.kz ақпарат агенттігі хабарлайды.

Жобаның басталуы және тоқтатылуы

Маңғыстау облысының дене шынықтыру және спорт басқармасы мен «H+HTECHNIKA, spol. s.r.o.» компаниясы 2018 жылдың 26 наурызында Ақтау қаласында 2500 орындық мұз сарайын салу және пайдалану туралы мемелекеттік-жекеменшік әріптестік шартына қол қойған болатын. Жер учаскесі 32А ықшам ауданындағы №2 жер теліміне бекітілді.

Алайда, құрылыс басталғанымен, көп ұзамай аймақ сыбайлас жемқорлық дауының орталығына айналды. Облыс әкімінің бірінші орынбасары Серік Аманғалиев 115 мың еуро көлемінде пара алғаны үшін ұсталып, кейін сотталды. Шарты бұзылғандықтан және нақты құрылыс жұмыстарының жоқтығынан, дене шынықтыру және спорт басқармасы жеке әріптеске сотқа дейінгі реттеу туралы талап арыз жолдады. Кейін бұл мәселе сотта шешімін тапты.

Сот шешімі және болашақ жоспарлар

Маңғыстау облысының мамандандырылған ауданаралық экономикалық сотының шешімімен мұз сарайын салу және пайдалану туралы мемлекеттік-жекеменшік әріптестік шарты бұзылды.

Содан бері шенеуніктер жобаны қайта жандандыру туралы уәделерін жиі айтқанымен, іс әлі күнге дейін оңға баспады. Бүгінде учаскеде тек орындалмаған жобаның қаңқасы ғана тұр. Бұл аймақтағы ірі сыбайлас жемқорлық оқиғалары мен орындалмаған үміттердің символына айналды. Ақтауда мұз сарайының болашақта пайда болатыны туралы мәселе ашық күйінде қалып отыр және оны дене шынықтыру және спорт басқармасы шешеді.

Жеке кәсіпкердің бастамасы

Бұл жағдайдан бөлек, жеке кәсіпкер Ақтау маңында екі жыл ішінде жеке инвестициялар мен несие есебінен стандартты модульді мұз айдынын салып, пайдалануға бергені белгілі болды. Бұл айдын жаттығу процестеріне арналған.