InfoHub Logo

Маңғыстау облысында жол қауіпсіздігін арттыру мақсатында жаңа форматтағы бақылау жүйесі енгізілді. "Сүзгі" бекеттері арқылы жүргізушілер қалай тексеріледі?

Бұл туралы Infohub.kz ақпарат агенттігі хабарлайды.

Облыс аумағындағы жолдарда жаңаша бақылау жүйесі – «сүзгі» бекеттері жұмыс істей бастады. Бұл жүйенің негізгі мақсаты – жол қозғалысын реттеу және жүргізушілерді іріктеп тексеру арқылы қауіпсіздікті күшейту.

Жолдағы жаңа бақылау жүйесі қалай жұмыс істейді?

Өңірлік полиция департаменті патрульдік полиция ротасының командирі Тайман Аншыбаевтың айтуынша, «сүзгі» бекеттері – бұл арнайы ұйымдастырылған учаскелер. Мұнда жолдың ені уақытша тарылтылып, көлік ағынының жылдамдығы азайтылады. Осылайша, жүргізушілерді тоқтатып, құжаттарын тексеруге және жол ережелерін сақтауын бақылауға мүмкіндік туады.

Қазіргі таңда мұндай бекеттердің бірі Ақтау-Бейнеу автожолының 144-шақырымында, Шетпе ауылы маңында орналасқан. Мұнда патрульдік полиция қызметкерлері жүргізушілермен профилактикалық әңгімелер жүргізіп, жол ережелерінің сақталуын қадағалайды.

Жобаның тиімділігі

Тайман Аншыбаевтың мәліметінше, бұл жоба көлік инспекциясымен бірлесіп атқарылуда және қазірдің өзінде оң нәтижелер көрсетіп үлгерген. «Сүзгі» бекеттерін енгізу арқылы жол қатысушылары үшін қауіпсіз орта қалыптастыру және өңірдегі жол-көлік оқиғаларының санын азайту көзделген.

«Жүргізушілерді жаңа талаптарды түсіністікпен қабылдап, жол ережелерін қатаң сақтауға шақырамыз», - деді Тайман Аншыбаев.

Естеріңізге сала кетейік, 2026 жылдың 12 наурызынан бастап Қазақстанда жүргізушілердің көлік жүргізу кезінде ұялы телефонды пайдаланғанын автоматты түрде анықтайтын өзгерістер күшіне енген болатын. Енді инспектордың қатысуынсыз, жаңа технологияларды қолдану арқылы бұзушылықтар үшін айыппұл салынады.