InfoHub Logo

Ресей президенті Владимир Путин Қазақстанмен арадағы қарым-қатынасқа қатысты пікір білдірді. Оның айтуынша, екі ел арасындағы келіссөздер әрдайым күрделі өтеді.

Бұл туралы Infohub.kz ақпарат агенттігі хабарлайды.

Мәжіліс кезінде Қазақстан ТРК президенті Раушан Қажыбаева Ресей басшысынан екі ел арасындағы достық пен ынтымақтастыққа негізделген бірлескен мәлімдеменің маңыздылығын бағалауды сұрады. Путин екі ел арасындағы ынтымақтастық дамып келе жатқанын, алайда көптеген мәселелер бойынша келіссөздердің оңай болмайтынын атап өтті.

Күрделі келіссөздер

«Біздің қазақстандық достарымыз, әріптестеріміз – оңай әріптестер емес. Бізде әрбір мәселе бойынша өте өткір пікірталас болып тұрады. Бұл қаржылық өзара қарым-қатынасқа, өнеркәсіптегі байланыстарға, инвестициялық қызмет шарттарына, ірі жобаларға қатысты. Бірақ екі тарап та тек қана жарасатын емес, ортақ мақсаттарға жетуге ықпал ететін компромисс табуға ұмтылады», – деді Путин.

Сонымен қатар, Ресей президенті Ресей мен Қазақстанды ғасырлар бойы қалыптасқан қарым-қатынас, кооперация, көлік байланыстары және ортақ білім беру кеңістігі байланыстыратынын айтты. Ол Қасым-Жомарт Тоқаевқа орыс тілін қолдау жөніндегі халықаралық ұйым құру бастамасы үшін тағы да алғыс білдірді.

АЭС құрылысы және жолбарыстар

Ресей президенті Қазақстанда АЭС салу жобасы туралы да пікір білдірді. Оның айтуынша, бұл жоба Қазақстанға өз энергетикалық жүйесін, сондай-ақ ғылыми және өндірістік базасын дамытуға көмектеседі.

«Ең бастысы – Қазақстанда атом электр станциясының блоктары салынатыны емес. Ең бастысы – жаңа саланың құрылатыны. Бұл кадр даярлауға, ғылыми және өндірістік қызметке қатысты. Мұның бәрі бірлескен жұмыс. Бұл бағыт бі үшін де, Қазақстан үшін де өте маңызды», – деп атап өтті ол.

Сонымен қатар, Раушан Қажыбаева Ресей президентінен жолбарыс популяциясын қалпына келтіру жобасы туралы сұрады. Бұл тақырып қазіргі уақытта Қазақстанда өзекті мәселелердің бірі болып отыр.

Путин бұл жобаны табиғатты қалпына келтіру және сирек кездесетін жануарлар түрлерін сақтау жұмысының бір бөлігі деп атады. Ол Ресейдің басқа елдермен осындай бағдарламаларға қатысқанын еске салды. Атап айтқанда, Тәжікстан Ресейге қар барыстарын берген.

«Мысалы, Тәжікстаннан бізге қар барыстарын берді, бұл үшін біз тәжікстандық достарымызға өте ризамыз. Біз Амур жолбарыстарының популяциясын сақтау үшін көп жұмыс жасадық. Бұл, айтпақшы, әлемдегі ең ірі жолбарыстар. Олардан үлкені жоқ. Бұрын Қазақстанда да осындай жолбарыстар болған», – деді Путин.

Егер Ресей Қазақстанға жолбарыс популяциясын қалпына келтіруге көмектесе алатын болса, ол бұл істі атқаратынын айтты. Сондай-ақ, Ресейде бұған дейін осы жануарларды сақтауға арналған халықаралық «жолбарыс саммитінің» өткенін еске салды.