InfoHub Logo

Қарағанды облыстық сотында соңғы жылдардағы ең резонансты қылмыстық істердің бірі бойынша үкім шықты. Карқаралы ауданынан шыққан жұбайлар мен олардың қызы алты патронаттық баланы жүйелі түрде қинап, азаптағаны үшін кінәлі деп танылды.

Бұл туралы Infohub.kz ақпарат агенттігі хабарлайды.

Сот үкімі

Облыстық ювеналдық сотының судьясы Советхан Смағұловтың айтуынша, отбасының басшысы 12 жылға, әйелі 10 жылға, ал қызы 4 жыл 8 айға бас бостандығынан айырылды. Олар орташа қауіпсіздік мекемесінде жазасын өтейтін болады.

Қылмыстық іс бойынша

Сот процесі бір жылдан астам уақытқа созылды. Бастапқыда айып тағылған жұбайлар балалар үйінен алты баланы патронаттық тәрбиеге алған. Тергеу нұсқасы бойынша, отбасы мемлекеттен балаларды асырауға ақша алғанымен, оларға қамқорлықтың орнына қорлау, соққы және қатыгездік көрсетілген.

Айыптау қорытындысы бойынша, балаларды ауыр жұмыстарға жегіп, мал бақтырып, кішігірім кінәсі үшін ұрып-соғып, тамақтан шектеген. Іс материалдарында кәмелетке толмағандарды нәжіс араласқан нан жеуге, иттің қорасында ұйықтауға мәжбүрлегені және басқа да қорлау мен зорлық-зомбылық әрекеттеріне ұшыратқаны туралы мәліметтер келтірілген.

Жәбірленушілердің өкілдері айыптаушы тараптың ұстанымын толық қолдап, айыпталушыларға қатаң жаза кесуді талап етті. Адвокат Берік Оразбековтің айтуынша, бес жыл бойы балаларға жасалған бұл зорлық-зомбылыққа қамқоршы органдардың немқұрайлылығы себеп болған.

Айыпталушылардың жауабы

Айыпталушылар кінәсін мойындамады. Ауыл мектебінің директоры қызметін атқарған отбасы басшысы өгей балаларын өз баласындай жақсы көргенін және ешқашан зорлық-зомбылық қолданбағанын айтты. Ол қылмыстық істі тапсырыспен жасалған іс деп атап, отбасының жаланың құрбаны болғанын мәлімдеді.

Айыпталушының адвокаты Әсел Қойшыбаеваның айтуынша, істе қылмыстық-процессуалдық заңнаманы бұзушылықтар көп болған және айыптаушы тараптың дәлелдері оның қорғалушысының кінәсін растамайды.

Айыпталушылар мен олардың адвокаттарының ұстанымына қарамастан, сот үшеуін де кінәлі деп танып, нақты мерзімге бас бостандығынан айыру жазасын тағайындады. Үкім әлі заңды күшіне енген жоқ және тараптар шағымдануы мүмкін.