InfoHub Logo

Қазақстан мен Қырғызстан арасындағы жерді жалға алу туралы маңызды келісімге қол жеткізілді. Бұл келісім бойынша Қазақстанға 49 жылға 58,8 гектар жер беріледі.

Бұл туралы Infohub.kz ақпарат агенттігі хабарлайды.

Келісімге сәйкес, Қазақстанға Ыстықкөл облысының аумағындағы курорттық-рекреациялық нысандарға қатысты меншік құқықтарын реттеу туралы келісім ұзартылды. Бұл келісім 2029 жылдың соңына дейін нысандарды (базаларды қоспағанда) 3-4 жұлдызды қонақүй деңгейіне дейін жаңарту міндеттерін қамтиды. Елдер арасындағы келісім алғаш рет 2006 жылдың 4 шілдесінде жасалған болатын.

Инвестиция тарту және нысандарды жаңарту

Сенат депутаты Нұрия Ниязованың айтуынша, тараптар Қазақстанға инвесторлар тартуға және берілген аумақтағы нысандарды бұзуға рұқсат беруге келіскен. Келісімде Қазақстанның төрт нысанға меншік құқығы белгіленген: «Қазақстан» санаторийі, «Самал» демалыс үйі, «Университет» спорттық-сауықтыру лагері және «Олимп» спорттық-сауықтыру орталығы.

«Қазіргі уақытта Президенттің Іс басқармасы Ыстықкөл көлінің жағалауында «Қазақстан» санаторийін салу бойынша инвестициялық жобаны жүзеге асыруда. Оны тапсыру мерзімі – шамамен 2026 жылдың 4-тоқсаны. Сондай-ақ, санаторий аумағындағы барлық ғимараттар мен құрылыстарды бұзу қарастырылған. Тек Дінмұхамед Ахметұлы Қонаевтың №1 жеке үйі тарихи-мәдени мұра ретінде сақталып, мемориалдық-үй мұражайына айналады», – деді Нұрия Ниязова.

Жерді жалға алу шарты

Екінші құжат – Қазақстан мен Қырғызстан үкіметтері арасындағы 2009 жылғы 1 желтоқсандағы Ыстықкөл облысының Ыстықкөл ауданындағы жер учаскелерін Қазақстанға жалға беру туралы шарт. Бұл шарт Қазақстанға жерді жалға алу құқығын береді.

«Шартқа сәйкес, Қазақстанға жалпы ауданы 58,8 гектар болатын жер учаскелері 49 жыл мерзімге уақытша, ақылы негізде пайдалануға (жалға алуға) берілді», – деп түсіндірді депутат.

Оның айтуынша, Қырғызстан тарапы жалға алынған нысандардың қол сұғылмаушылығына кепілдік беріп, оларды мемлекет меншігіне алуға бағытталған әрекеттерден бас тартуға міндеттенеді.