InfoHub Logo

Алматыдағы Сайран көлін жаңарту жұмыстарын кешіктірген «Павлодар өзен порты» АҚ-ның мемлекеттік сатып алуларға қатысушылар тізімінен «теріс пиғылды» деген мәртебесі алынып тасталды. Бұл туралы Алматы қалалық сотының азаматтық істер жөніндегі сот алқасының 2025 жылғы 29 желтоқсандағы қаулысында айтылған.

Сайранды жаңарту жобасы 2024 жылдың ақпанында басталған. Жобаны жүзеге асыру үшін бюджеттен 12 миллиард теңге бөлінген. Мердігерге 2023 жылы 367 миллион теңге, ал 2024 жылы қалған қаржы берілген. «Павлодар өзен порты» АҚ жұмысты 2025 жылдың 31 мамырына дейін аяқтау тиіс болған. Алайда, қыркүйек айының басында да жұмыстар аяқталмаған еді.

2025 жылдың тамызында Алматы қаласының қоғамдық кеңістікті дамыту басқармасы сотқа талап-арыз берген болатын. Сот мердігерді мемлекеттік сатып алуларға қатысушылар тізіміне енгізіп, 23 миллион теңгеден астам айыппұл мен 699 511 теңге мемлекеттік бажды өндіріп алуды міндеттеген.

Алайда, сот алқасы Сайранды жаңарту жобасының күрделі әрі қымбат болғанын, талап-арыз түскен кезде жұмыстың мәре-сәресіне жақындағанын атап өтті. Мердігер келісімшарт мерзімі өтсе де, жұмысты тоқтатпаған және анықталған кемшіліктерді жоюмен айналысқан.

Сот шешімінің себебі

«Мұндай жағдайда сот алқасы мердігердің әрекетінде теріс пиғылдың белгілері жоқ деп есептейді. Өйткені, жұмыс мерзімі ұзартылғанына қарамастан, басқарма компанияның міндеттемелерді орындаудан бас тартқанына дәлел келтіре алмады. Осыған байланысты, жауапкерді мемлекеттік сатып алуларға қатысушылар тізіміне енгізу және жұмысты аяқтау міндетін өзгерту туралы сот шешімін күшін жою қажет», - делінген қаулыда.

Сот мемлекеттік баждың мөлшерін 695 579 теңгеге дейін азайтты. Қаулы заңды күшіне енді. Енді шешімді тек кассациялық тәртіппен ғана қайта қарауға болады.

2025 жылдың қыркүйек айында «Павлодар өзен порты» АҚ-ның Күнаев атындағы Үлкен Алматы каналына күрделі жөндеу және Алматы өзені арнасын реконструкциялау жұмыстарымен де айналысып жатқаны белгілі болды.