InfoHub Logo

Шымкент қаласының прокуратурасы 1,7 миллиард теңгеге жуық бюджет қаражатын тиімсіз жұмсаудың алдын алды. Бұл ақша ешқандай үйі, тұрғыны жоқ аумаққа инженерлік инфрақұрылым тартуға бағытталған болатын.

Бұл туралы Infohub.kz ақпарат агенттігі хабарлайды.

Жобаның негізсіздігі анықталды

Қала прокуратурасы мемлекеттік қаражатты жоспарлау және пайдалану кезінде заң бұзушылықтарды анықтады. Бір микроауданда инженерлік инфрақұрылым құрылысы жобасы бойынша бюджет қаражаты тиісті негіздемесіз қарастырылғаны белгілі болды. Себебі, аталған аумақта тұрғын үйлер, халық және қажетті құрылыстар болмағандықтан, инженерлік желілерді тартуға нақты қажеттілік туындамаған.

Қаржыландыру қысқартылды

Жер учаскелерінің бір бөлігінің бөлінбегені, жобалық-сметалық құжаттаманың нақты жағдайға сәйкес келмегені және жобаны қазіргі жағдайда жүзеге асыру мерзімінен бұрын әрі экономикалық тұрғыдан тиімсіз екені анықталды. Прокурорлық қадағалау актісінің нәтижесінде қаржыландыру параметрлері қайта қаралды. Қосымша келісімге қол жеткізіліп, 1,7 миллиард теңге көлемінде шығындар қысқартылды. Бұл бюджет қаражатының тиімсіз қолданылуын болдырмады.