كىرلەگەن ءدۇربىنى كىم تازارتادى؟
كامالعا حات
كامال دوس! «قايدا بولسا — قايشىلىق» دەگەن حاتىڭدى («ەگەمەن قازاقستان»، 21-ماۋسىم، 1997 ج.) جولاۋشىلاپ جۇرگەنىمدە وقىدىم.
ارينە، قايشىلىق! قايشىلىق بولماسا دۇنيە الدەقاشان جۇماققا اينالماس پا ەدى. قايشىلىق قۇدايدىڭ قۇدىرەتىنە قارسى ارەكەت. ونى ەجەلدەن بەرى ءورشىتىپ كەلە جاتقان ازازىلدەر ءناسىلى. ازازىلدەر ءناسىلى تۋمىسىنان بەرى قاراي زورلىقشىل، بار ماقساتى ادامدى تۇقىرتىپ باعىندىرۋ، قۇل ەتۋ.
كامال، سەن ورىستىڭ «پوكوريت» دەگەن بۇيرىق رايداعى گلاگولىنىڭ قانشالىقتى ءزارلى ەكەنىن سەزەسىڭبە؟ مىنە، ازازىلدەردىڭ ۋرانى — پوكوريت، باعىندىرۋ. سودان بارىپ «پوكوريتەل»، «پوكوريتەلي» دەگەن زات ەسىم تۋىندايدى.
وسى سۇيكىمسىز ءسوز ءبىرازدان بەرى قايتادان جاندانىپ، باس كوتەردى. ءبىر قاراعاندا ەلەۋسىز، قۇلاق ۇيرەنىپ كەتكەن زالالسىز ءسوز سياقتى. بۇلانايداعى (گيمالاي) ەۆەرەست شىڭىن ءبىزدىڭ ءبىر توپ قازاقستاندىقتار «باعىندىرىپتى». بۇلاناي ءبىر تۇشكىرسە، «پوكوريتەلدەردىڭ» سۇيەگىن دە تابا الماي قالاتىندارىمەن ءىسى جوق. تاڭىرگە تاۋبە ايتۋدىڭ ورنىنا، «باعىندىردىق، باعىندىردىق!» دەپ داۋرىعادى.
حرۋشيەۆتىڭ كوتەرۋ» داۋىرىندە وسى ۇران تاسىراڭدادى. پوكوريم سەلينۋ! پوكوريتەلي سەلينى دەگەن استام لەپ قازاقستاندى، قازاقتاردى باعىندىرۋ ەكەنىن بىلسەك تە بىلمەگەن بولدىق.
«باعىندىرۋ» — «پوكوريت» قاھارلى ءسوز، قارعىس اتقىر، قاسام ۇرعىر ۇعىم.
ال ءبىزدى ءالى باعىندىرىپ جاتىر، كامال. ونى س ەن بىلەسىڭ بە؟ جو-جوق. باياعىداي زەڭبىرەكتىڭ كۇشىمەن ەمەس. ءبىراق وق شىعارماي-اق باعىندىرىپ جاتىر. شەتەلدىك اراق-شاراپ دارياسىن اعىزىپ جىبەرسە، سيركتەگى ازۋ ءتىسىن قاعىپ تاستاعان ارىستان سياقتى ۇزىن قامشىلى ءامىرشىنىڭ ايتقانىنا كونىپ، ايداۋىندا جۇرە بەرەسىڭ.
بۇل كۇشتىلەردىڭ ەجەلگى ءادىسى. ادامدى الدىمەنەن اقىلىنان، جىگەرىنەن اجىراتساڭ — ار جاعى كەرەك، ءتۇرتىپ قالساڭ قۇلاي بەرەدى. ال مۇناي توبىر ساز بالشىققا يەلەۋگە وتە يكەمدى.
باعىندىرىپ جاتىر. اراق بەرىپ،اقشا بەرىپ، باسقا دىنگە توپ-توبىمەن قويداي ايداپ كىرگىزىپ جاتىر.
كەمال باۋىرىم! ەڭ سۇمدىعى — وسىنىڭ ارتى نە بولاتىنىنا كوز جەتپەيدى. بۇل يمپەريا اتتى الپاۋىتتىڭ الماس قىلىشتان دا وتكىر قارۋى. اعىلشىندار ءۇندىستاندى وتارلاپ، قانىن سورىپ بولىپ، ەندى سول ءۇندىستانعا بوستاندىق ءبىرتۇتاس ەلدى الديلەپ، قاساقانا ەكىگە ءبولىپ كەتتى. ءۇندىستان، پاكىستان دەپ. ءدىني سيپاتىنا قاراي ءبولدى عوي. ءبىر كەزدەگى ءبىرتۇتاس ال ەندى قىرعيقاباق بولىپ قىرقىسادى دا جاتادى. ويتكەنى دىندەرى بولەك-بولەك.
ءدىني ايىرىمىنا قاراي قانتوگىس گرۋزيندەر مەن ابحازدىقتار اراسىندا، ازەربايجاندار مەن ارمياندار اراسىندا ارانداتىلادى. ءالى نەمەن تىنارى بەلگىسىز.
تىزە بەرسە مۇنداي مىسالدار كوپ.
ال ەندى ويلاپ كور. ءبىر قازاقتىڭ وتباسىندا اكەسى مۇسىلمان، بالاسى باپتيست، قىزى — كريشينا، ياكي باقاشىل. سوندا نە بولماق؟
ال ەندى وسى ۇلگىنى بۇكىل قازاققا سال. سوندا نە بولماق؟
ءبىزدىڭ بيىك ساياساتشىلار وسىنى بىلە مە ەكەن؟ بىلسە دە ادەيى كوز جۇمىپ وتىرا بەرە مە؟
سەن قالاي ويلايسىڭ كامال؟
كامال، سەن سوڭعى حاتىندا قازاق حالقىنىڭ دەمورگرافياسىنان ناقتى ساندار كەلتىرىپ، كوتەرىڭكى كوڭىلدى سۋ سەپكەندەي باستىڭ. قازاقستاندا قازاقتار ەلۋ ءبىر پايىزعا جەتتى دەپ ءماز بولىپ جۇرسەك، 1995 جىلى بالا تابۋعا قابىلەتتى مىڭ اناعا شاققاندا توقسان-اق ءسابي دۇنيەگە كەلگەن ەكەن.
ءبىراق شىلدەحانا تويى نەگە تىم-تىم ازايىپ كەتتى؟ بۇلاي سوزىلا بەرسە ەرتەڭىمىز نە بولادى دەپ قايىرعان ەشكىم جوق.
مىنە، بۇل باعىندىرۋدىڭ ەڭ زور ءتۇرى.
بايقايسىڭ با، بۇرىندارى «التىن القالى»، «كۇمىس القالى» انالار ءتىزىمى گازەت بەتىنە سىيماي جاتاتىن. قايدا ءسال ءقازىر؟
ۇكىمەتتەن ولاردى قولداۋ سارقىلعان.
ال ءوزى بالالارىن تۋماي جاتىپ جۇتىپ قوياتىن، تۋعان سوڭ دا جەپ قوياتىن ۇلتتا بولاشاق جوق، كامال. ابورتتان قىرىلعان بالالار، تاستاندى بالالار، ەكولوگيالىق اپاتتان، اشتىقتان اۋرۋ-سىرقاۋ بالالار-وسىنىڭ ءبارى ءبىزدىڭ ەرتەڭىمىزدى قىناداي قىرىپ جاتىر.
سەن ايتاسىڭ: «شەت جەردە جۇرگەن ءتورت ميلليون قازاقتى كوشىرىپ اكەلىپ اتا قونىسىنا ورنالاستىرۋ»-حالىقتى كوبەيتۋدىڭ ءبىر شاراسى دەيسىڭ؟ نيەت دۇرىس قوي.بۇلاي ايتۋعا وڭاي. ال ءىس جۇزىندە نە بولىپ جاتىر؟ شەتەلدە جۇرگەن باۋىرلاردىڭ قازاقستانعا، اتاجۇرتقا دەگەن قۇشتارلىعىن ماڭدايىنا ات تەپكەندەي تۇقىرتىپ تاستادى عوي ءبىزدىڭ ۇكىمەت. باسقاسى باسقا «كوشى قون تۋرالى» جانە زاڭنىڭ جوباسىندا شەتەلدەن كوشىپ كەلەتىن ءبىزدىڭ قانداستارىمىزعا دەگەن قارجى-كومەكتى نەگىزىنەن جەرگىلىكتى بيۋدجەتكە جۇكتەي سالىپتى. اۋ، جەرگىلىكتى جەردە ءقازىر بيۋدجەت بار ما؟ جەگىلىكتى جەر ءوز كۇنىن ءوزى كورە الماي، مۇعالىمدەرگە، دارىگەرلەرگە، تاعى باسقا پاقىرلارعا ەڭبەكاقى تولەي الماي، كارى-قۇتاڭعا زەينەتاقى تولەي الماي، «ءبيتىن سىعىپ، قانىن جالاپ» وتىرعان جوق پا؟ سوندا جەرگىلىكىتى بيۋدجەت كوشىپ كەلگەن اعايىنعا نەسىن تولەيدى؟
جاڭا زاڭ جوباسىندا الىستان، جاقىننان، موڭعولستاننان، قىتايدان، يراننان، وزبەكستاننان، رەسەيدەن تاعى باسقا جەرلەردەن كوشىپ كەلگەن قازاقتارعا قازاقستان ازاماتتىعى بەرىلسىن دەگەن ءسوز جوق.
دەمەك ولار ءالى وگەي دەگەن ءسوز. دەمەك ولار سايلاۋعا دا، داۋىس بەرۋگە قاتىسا المايدى دەگەن ءسوز.
سوندا نەسىنە جەتىسىپ ءماز بولامىز!؟
قىتايدا ءبىر ميلليوننان استام قازاق بار دەپ كوڭىلگە توق ساناپ ءجۇرمىز. شەتەلدە جۇرسە دە ايتەۋىر كوڭىلگە دەمەۋ. ال ەندى سول قازاقتاردىڭ الداعى ءبىر جيىرما جىلدىڭ شاماسىندا سەلدىرەپ قالاتىنىنان حابارىڭ بار ما، كامال؟ نەگە دەيسىڭ عوي. نەگە دەسەڭ قىتايدا بۇرىن تەك قىتايلارعا عانا: وتباسىنا ءبىر عانا بالا-دەگەن زاڭ بار بولسا، ەندى سول زاڭ سونداعى قازاقتىڭ باسىنا دا تۋعان.
ەكى مەملەكەت باسشىلارى ءباۋتالاسىپ، ونداعى ەرىكتى قازاقتاردى قازاقستانعا تەزىرەك كوشىرىپ الماسا، ساقال سيپاپ قالماقشىمىز.
سونداي-اق مەملەكەت باسشىلارى قازاقستانعا كوشىپ كەلەتىن قازاقتاردىڭ ازاماتتىعىن بيۋروكراتتىق بۇرالاڭ جولعا سالماي، ءبىرجولاتا شەشپەسە، بىزگە كەلگەن اعايىن قازىرگى جەكەشەلەندىرۋ زامانىندا نە جەر المايدى، نە جۇمىسقا ورنالاسا المايدى، نە سايلاۋعا قاتىسا المايدى.
بۇدان اسقان قاتىگەزدىك، ادام قۇقىعىن اياققا تاپتاۋ بولا ما ءسىرا؟!
قازاقستان پرەزيدەنتى، وبالى نە كەرەك، شەتەلدەگى قازاقتاردىڭ قامىن ويلاپ، نەشە الۋان جارلىقتار جاريالادى. ءبىراق سول جارلىقتار ورىندالۋعا كەلگەندە كىبىرتىكتەپ قالادى. مىسالى، بيىل شەتەلدەن 2180 وتباسىن عانا قابىلداۋ كەرەك. اۋرۋ ادامنىڭ اۋزىنا سۋ تامىزعانداي.
كوشى-قون ىسىمەن بۇرىن ەڭبەك مينيسترلىگىندەگى دەپارتامەنت اينالىسار ەدى. كەزىندە بۇل جەكە مەملەكەتتىك بولسىن دەپ وڭەش جىرتتىق. توقال ەشكىنىڭ قۇدايدان ءمۇيىز سۇراپ ءجۇرىپ، قۇلاعىنان ايىرىلعانىنىڭ كەرى ەندى كەلدى. ازىرقانىپ جۇرگەن دەپەرتامەنتتىڭ ءوزى كىشىرەيىپ كەتتى. جاڭا زاڭ جوباسى بويىنشا كوشى-قون جونىندە «وكىلەتتى ورگان» دەگەن قۇرىلماقشى ەكەن. ءبىراق زاڭدا ول وكىلەتتىلىكتىڭ قانشالىقتى پارمەندى ەكەنى ايتىلمايدى. نەدە بولسا بۇل ىسكە شىن ءپارۋانا بەرىلگەن، قازاق دەگەن قانى بار، نامىسى، جىگەرى بار ادامدار كەلسە ەكەن دەپ تىلەيىك.
رەسەيلىك التاي ولكەسىنەن، قوساعاشتان كوشىپ كەلگەن ءبىر مىڭ بەس ءجۇز قازاق قازاقستاننان پانا تاپپاي، قايتادان قوساعاشقا كوشكەن عوي. كەيبىر دەرەكتەرگە قاراعاندا، سول مىسكىندەر نە ارىدا، نە بەرىدە جوق، ەكى ورتادا ساندالما كۇيگە تۇسكەن. بۇرىنعى ءۇي-جاي، جۇمىس ورنى جوق، التايلىقتار مەن قازاقتار اراسىندا وسىعان بايلانىستى ازداپ شەكىسۋلەر دە بار كورىنەدى.
مىنە، بۇل قازاقتىڭ كوسەگەسى كوگەرسىن دەگەن ادامنىڭ ءىسى ەمەس.
جاڭا زاڭ قابىلدانار. ءبىراق سول زاڭنىڭ ورىندالۋىن ايت. مەن وقىعان جوبادا كوشىپ كەلگەن، كەلەتىن ازاماتتاردىڭ ازاماتتىعى تۋرالى ءلام جوق. ال قازاقستان ازاماتتىعى جوق ادام-پۇشايمەن، كەمباعال ادامنىڭ ءحالىن كەشپەك.
كامال سەن بايقايسىڭبا، موڭعولستاننان، قىيتايدان كوشىپ كەلگەن اعايىنداردىڭ اراسىندا ادەبيەت پەن ونەردىڭ نەبىر تالانتتى وكىلدەرى بار. بۇل دەگەن ۇلتتىق مادەنيەتتىڭ باعا جەتپەس بايلىعى عوي. بىلە بىلسە، ۇكىمەت ولاردى وسىنىسى ءۇشىن دە ايالاپ، باعالاۋى كەرەك قوي.
ءبىراق وزىمىزدەگى قولدا بار مادەنيەتتىڭ قابىرعاسى قاقىراپ جاتقاندا، اۋىلدىق جەرلەردە كلۋب، كىتاپحانا، كوركەمونەرپازدار ۇيىمى، حالىق تەاترلارى جاپپاي جابىلىپ جاتقاندا؛ ول-ول ما، مۇيىزدەرى قاراعايداي-قاراعايداي جازۋشىلار مەن ارتىستەر، سۋرەتشىلەر مەن جۋرناليستەر-تاپقانى تاماعىنا، پاتەراقىسىنا جەتپەي جاتقاندا كىم كىمدى ەلەگەندەي زامان.
كامال دوس. ەكەۋمىز دە پايعامبار جاسىنان اسىپ كەتتىك. قىرىق جىلدان استام ۋاقىت، ەگەر سوعىس جىلدارىنداعى بالا ەڭبەگىن قوسا ەسەپتەسەك، ەلۋ جىلدان استام ۋاقىت، ەل ءۇشىن، قوعام ءۇشىن ايانباي تەر توكتىك. يا، قۇداي، جاس كۇنىمدە بەينەت بەر، قارتايعاندا زەينەت بەر دەپ تىلەدىك. سول تىلەك ۇستىندە ءبىز ءبىر ءتۇيىر ارتىق مال جيعان جوقپىز. ەڭبەگىمىز ەش كەتپەس، وكىمەت جەرگە قاراتپاس دەدىك. ءسويتىپ جۇرگەندە، پەنسياعا شىققاندا داچا ساتىپ الارمىن، ماشينە ساتىپ الارمىن دەپ تىسىمىزدى-تىسىمىزگە قويىپ، تىرنەكتەپ جيناپ، امانات كىتاپشاسىنا سالعان تيىن-سيىنىمىز ءبىر كۇننىڭ ىشىندە كۇيدى دە كەتتى. جالعىز مەن ەمەس، جالعىز سەن ەمەس،ەڭبەكقور ءدۇيىم حالىق سولاي بولدى.
مىنە بۇل ادىلەتسىزدىك!
كامال! ادىلەتتىڭ اكەسى ءولىپ، شەشەسى جەسىر، ءوزى جەتىم قالعان دەسەدى. سول راس-اۋ ءسىرا ايتپەسە، عۇمىرىم بويى ايانباي تەر توككەن مەن كىم ءقازىر، قوعامعا ءبىر تيىن پايدا كەلتىرمەي، تابان استىندا شىلقىما بايىپ شىعا كەلگەن نۋۆوريش كىم؟
كوشەدەن جاسىل شامعا قاراپ وتە بەرگەنىمدە، تاسىراڭداپ «مەرسەدەسپەن» قاعىپ كەتە جازدايتىن بوقمۇرىن بوزبالا قوعامعا نە بەردىم؟ تارازى قايدا؟ ادىلەت تارازىسى. تۇبىرىنە قاراساڭ: الگىنى تايراڭداتقان ءبايلىق-بىزدىڭ جىلدار بويى ەتكەن ەڭبەگىمىزدىڭ جەمىسى عوي.
ال سەن بولساڭ «ينتەرەنت»، «ينتەلسات» دەيسىڭ. «وپتيكالىق تالشىقتى بايلانىس كابەلى » دەيسىڭ. وۋ، جارقىنىم، سەن اۋىلعا شىقپاعالى كوپ زامان وتكەن-اۋ ءسىرا.اۋىلداعى مەكتەپتە سەنىڭ الگى ايتقانداردىڭ ءونى تۇرماق تۇسىنە دە كىرمەس.كومپيۋتەر دەگەننىڭ نە ەكەنىن بىلمەيدى.ححI عاسىرعا ءبىزدىڭ اۋىل جاستارى شالا ساۋاتتى، دۇمبىلەز كۇيىندە بارادى.سەن ايتقان كەرەمەتتەردى بىلسە، تەك شەتەلگە شىعىپ وقيتىن شونجارلار بالالارى، شىر-جىر بالاق، شۇبارتاس بالالارى عانا بىلەدى. سول مىقتىلار قازاقستاننىڭ بولاشاق بيلەۋشىلەرىن ءقازىردىڭ وزىندە شەتەلدە دايىنداپ جاتىر. وزىمىزدەگى جوعارعى وقۋ ورىندارىنا دا قولى جەتكەن اۋقاتتىلاردىڭ بالالارى تۇسەدى. كەدەيلەر وقي المايدى.
قازاقتىڭ مايەگى اۋىلدا ەدى. اۋىل باردا قازاق حالقىنىڭ ءناسىلى اسىل ەدى. سول مايەك ءقازىر ءىري باستادى. امەريكانى العاش جاۋلاپ الۋشىلار بايىرعى تۇرعىن-ۇندىستەردىڭ قيان-كەسكى قارسىلىعىنا تاپ بولعان عوي. ساداقپەن قارۋلانعان ۇندىستەردى زەڭبىرەكپەن جەڭە الماعان. سوندا ءبىر سۇڭعىلا زىميان ايتتى دەيدى: ۇندىستەردى جەڭۋ ءۇشىن اۋەلى بيزوندى قىرىڭدار دەپ. ال زەڭگى بابانىڭ ءىرى ءتۇرى-بيزون ۇندىستەردىڭ اسىراۋشى ازىعى ەدى. بيزون جاپپاي قىرىلدى-ۇندىستەر جەڭىلدى، رۋحى سىندى. ۇندىستەردىڭ قازىرگى قالعان-قۇتقان ۇرپاعى ونى ايتپاي-اق قويايىن، وتە ايانىشتى.
ال سوناۋ بوزبالا تاڭدى زاماننان بەرى قازاقتى اسىراعان مال ەمەس پا ەدى، كامال؟ قازاق مالدان اجىرادى عوي. قولدان اجىراتتى.
سوناۋ قاھارلى وتىز ەكىنشى-وتىز ءۇشىنشى جىلدارى الدىمەن مال كەتكەن، ارتىنشا ادام كەتكەن. بىر-ەكى جىلدىڭ كولەمىندە قىرىق ميلليون باستان بەس-اق ميلليون قالعان.
اراعا الپىس جىل سالىپ قازاقستان قىرىق ميلليون باس مالعا ارەڭ جەتىپ ەدى. مەنىڭ اقىلىم جەتپەدى، كامال. وسىنىڭ ءبارى نە ءۇشىن؟ قامقورشىلار قازاقتى مالدان بوساتىپ، ەندى جەر ەمسىن دەگەن شىعار. دۇرىس-ە-ەس.
كوردىم كامال. تالاي جەردى ارالادىم. ۇكىمەتتىڭ جانى اشىلماعان حالىققا بيىل كوكتىڭ جانى اشىعانداي ەدى. جاۋىن مول بولدى. اي، اينالايىن اعايىننىڭ تىپىرلاعانى-اي. جەر جىرتا الماي شارق ۇرىپ، جانتالاسقا تۇسكەنى-اي. ۇكىمەت نەسيە بەرمەدى. بەردىك دەيدى، وتىرىك ايتادى. بەرسە دە ماردىمسىز كوز بوياۋ.
ەندى ءدال ءقازىر پىشەن شابۋ ناۋقانى مەن ەگىن وراعى قاتار كەلدى. بۇل دەگەنىڭ جەردىڭ استىندا مىڭداعان جىل جاتا بەرەتىن كومىر ەمەس، از كۇندە جيىپ الساڭ-الدىڭ، الماساڭ-توگىلەدى، قۋرايدى.
ال شارۋانىڭ شاماسى جوق. بايعۇس-اي، قينالدىڭ عوي، ءبىر جىلعا كومەكتەسەيىن، ودان ءارى قاراي ءوز كۇنىڭدى ءوزىڭ كورىپ كەتەرسىڭ دەگەن ءسوز اۋىل شارۋاشىلىعىنىڭ كوسەمدەرىنەن ەستىلمەيدى. ولار اۋىلدىڭ اۋىر تىرشىلىگىنە كىرلەگەن دۇربىمەن قاراپ وتىر. ءدۇربىنى تازارتقىسى كەلمەيدى. تازارتسا-ازاپ الەمى كورىنىپ قالادى. ادەيى بۇلىڭعىر، مۇنار-مۇنار كورىنىستى قالايدى. ءسويتىپ وزگەنى دە، وزدەرىن دە الدايدى.
قامقورشىلار قازاقتى مال ازابىنان قۇتقارىپ، جەردەن جەمىس تەر دەگەندەگىسى وسى. مۇندايدا قول ۇشىن بەرمەگەن، قولدان الىپ، قولتىقتان سۇيمەگەن قامقورشى كىمگە، نەگە كەرەك؟
كامال، سەن بۇعان جاۋاپ تاۋىپ كورشى.
مەنىڭشە ونسىز دا كىرلەگەن دۇنيەگە كىر باسقان دۇربىمەن قاراۋعا بولمايدى.
پرەزيدەنتتىڭ جارلىعىمەن 28-ماۋسىم باسپا ءسوز كۇنى دەپ جاريالاندى. مەرەكەڭ قۇتتى بولسىن، كامال! الايدا مەرەكە دەگەن قۇر داۋىرىقپا، ماقتانسوق، ياكي جاعىمپاز جىلتىراق ءسوز ەمەس. قايتا ءدال مەرەكە كۇنى اششى شىندىقتى ايتا بىلۋگە دايىندالساق كەرەك-تى.وتىرىك ماقتاۋ-اسقا ۋ قوسىپ بەرۋمەن بىردەي. سوندىقتان دا مەن جالاڭ جالباقتاۋعا ادەيى بارمادىم. جاۋدىڭ ەڭ جامانى-جارامساق. جوقتى بارداي، تايلاقتى نارداي ەتىپ قامپيتىپ، شىندىقتى بۇلدىرەتىن سول جاعىمپاز.
مەنىڭ تاتارستانداعى اسا ءقادىرلى دوسىم، اتاقتى دراماتۋرگ تۋفان مينۋللين ءوزىنىڭ «دوستار جينالعان جەردە» اتتى پەساسىندا مىنانداي سۇراپىل سۇراق قويدى: ورمان.ازازىل-پەرىلەر. بۇكىر.ازازىل-پەرىلەر: «سەيسەنبى»-دەپ ايقايلادى، بۇكىر كۇن جۇما ەكەنىن بىلە تۇرا ول دا: «سەيسەنبى! سەيسەنبى!»-دەپ ايقايلايدى. بۇكىرى جازىلىپ كەتەدى.
ورمان. ازازىل-پەرىلەر. ەكىنشى بۇكىر. ازازىل-پەرىلەر: «سەيسەنبى!سەيسەنبى!»،-دەپ پەرىل ەردى قوستاپ، بۇكىردەن ايىعۋ كەرەك پە؟ جوق، شىندىقتى ايتىپ: «جۇما! جۇما!دەپ، ارقاعا ەكىنشى بۇكىر جاماپ الۋ كەرەك پە»
سەن نە دەر ەدىڭ كامال؟
شەرحان مۇرتازا
26-ماۋسىم 1997
You Might Also Like
-
ح.دوسمۇحامەدوۆ اتىنداعى اتىراۋ ۋنيۆەرسيتەتى ستۋدەنتى ناۋرىزبايەۆا ينديرا باكبەرگەنوۆنا
