زەينەت كۇرەسپەن كەلەدى
قازاقستان مەملەكەتتىك تەلەراديو كومپانياسىنىڭ ءتوراعاسى شەرحان مۇرتازامەن سۇحبات
— ءسىز باس رەداكتور بولىپ قىزمەت اتقارعان باسىلىمدار قالىڭ وقىرماننىڭ ىنتا-ىقىلاسىن اۋدارىپ وتىراتىنىنا كۋامىز. سونىڭ ءبىر سونى مىسالى — «ەگەمەندى قازاقستان». جۇرتشىلىق قازاق تەلەراديو كومپانياسىنىڭ ءتوراعاسى بولۋىڭىزدى دا ۇلكەن ۇمىتپەن، قۋانىشپەن قابىلدادى. جاڭا قىزمەتىڭىزدەگى العاشقى ۇيىمداستىرۋشىلىق ءىس-شارالارىڭىزدى نەدەن باستاۋداسىز ؟
— كەلەسى سۇراعىڭا كوش، — دەدى شەر-اعاڭ تەمەكىسىن تۇتاتىپ جاتىپ.
— مەملەكەتتىك ءتىلدى ناسيحاتتاۋدا، ءىس جۇزىندە جولعا قويۋدا تەلەديدار مەن راديونىڭ ورنى ءبىر بولەك. اتالعان قۇرالداردا ماسكەۋدىڭ ىقپالى ءالى كۇنگە دەيىن باسىم. ونىڭ ۇستىنە وزىمىزدە اشىلعان جاڭا كوممەرسيالىق كانالداردا دا ورىس تىلىندەگى حابارلار جەتەكشى ورىن الۋدا. بۇل جايلى ايتىلىپ تا، جازىلىپ تا ءجۇر. وسى تۇرعىدا جاڭا باسشىلىق نەندەي شارالار ويلاستىرۋدا؟
— مەملەكەتتىك ءتىلدى زاڭداستىرۋ ماسەلەسى ءالى ءجۇرىپ جاتىر. نەگىزگى زاڭ جوباسى تۋرالى ايتىس-تارتىس كوپ. ءتۇرلى پىكىرلەر بار. مەن تاۋەلسىز مەملەكەتتەر دوستاستىعىنا كىرەتىن ءبىرسىپىرا ەلدەردىڭ كونستيتۋسيا جوبالارىن قاراپ شىقتىم. مىنە، ءقازىر دە الدىمدا قىرعىزستان رەسپۋبليكاسى نەگىزگى زاڭىنىڭ جوباسى جاتىر. قىرعىزدار مەملەكەتتىك ءتىل — قىرعىز ءتىلى دەيدى. وسىمەن ءبىتتى. باسقا ەشقانداي تىركەمە ءسوز جوق. جاڭا جولدان باستاپ رەسپۋبليكاداعى باسقا دا تىلدەردىڭ دامۋىنا جاعداي جاسالاتىنىن قىسقاشا ايتىپ وتكەن. بىزدە قالاي؟ مەملەكەتتىك ءتىل — قازاق ءتىلى، ال ۇلت ارالىق ءتىل — ورىس ءتىلى دەيمىز. جانە ۇلت ارالىق ءتىل مەملەكەتتىك تىلمەن قاتار جۇرەدى، تەڭ قۇقىلى دەيمىز تاعى ءبىر جەرىندە. ۇلت ارالىق ءتىل دەگەنىمىز نە؟ مۇنداي ءسوز نەدەن شىقتى؟ وسىنى ءبىر ەكشەپ، تارازىلاپ الايىقشى. ماسەلەن، قازاق ءتىلىن بىلگەن ادام كەز كەلگەن تۇركى تىلدەس حالىقتارمەن ۇعىسىپ، تۇسىنىسە الادى ەكەن. نە سەبەپتى كازاك ءتىلى ۇلتارالىق ءتىل بولا المايدى؟ ورىس ءتىلىنىڭ تاريحي وتانى بار. ول جانە كەمەلدەنىپ، كوركەيگەن ءتىل ەكەنى بەلگىلى عوي. قازاق ءتىلى بولسا، ءالى كۇنگە تۇرمىستا قولدانۋدان ءارى اسا الماي وتىر. ءبىزدىڭ ايتىسىپ جۇرگەنىمىز دە ءتۇرلى توسقاۋىل، قاقپانداردىڭ قورشاۋىندا قالعان قازاق تىلىنە ەركىندىك بەرۋدىڭ جولى، امالى. باسقاشا ايتساق، وتارلىق ساياسات تۇسىندا جوعالتقانىمىزدى تابۋ، وشكەنىمىزدى جاندىرۋ. ارى-بەرىدەن سوڭ، ءقازىردىڭ وزىندە مەملەكەتتىك ءتىل تۋرالى زاڭ بار ەمەس پە؟ سونى ءىس جۇزىنە اسىرۋ قالاي؟ بىزدە باردى ۇقساتا ءبىلۋ جاعى جەتىسپەيدى. جالقاۋلىق، ءوزىن-وزى سىيلاماۋشىلىق رەسمي ورىنداردا عانا ەمەس، قاراپايىم حالىقتىڭ اراسىندا دا بار. ۇيدەگى، كوشەدەگى شۇلدىرلەگەن اڭگىمەمىزدى ايتپاي-اق قويايىن. تەلەديداردان، راديودان بەرىلەتىن حابارلاردىڭ وزىندە ءتىلشى دە، وعان جاۋاپ بەرىپ وتىرعان جۇمىسشى، قىزمەتكەر، ءتىپتى شارۋا ادامى دا انا تىلىندە تازا سويلەۋگە ۇمتىلمايتىنى بايقالادى. بارىنە بىردەي توپىراق شاشۋعا بولماس. ءبىراق تىلشىلەرىمىز قازاق ءتىلىنىڭ مۇمكىندىگىن پايدالانۋعا شورقاق. جۇرگىزىلگەن سۇحباتى ورىسشا سوزدەرمەن ارالاسىپ، قويىرتپاق بولىپ شىعىپ جاتادى. مۇنداي دارمەنسىز، شالاجانسار دۇنيەلەر ەل-جۇرتقا قانداي تاربيە بەرە الادى؟ ءبىر مەزگىلدە ميلليونداعان ادام زەر سالاتىن تەلەديدار" مەن راديونىڭ تالىم-تاربيەلىك ءمانى وراسان زور دەر ەدىم. سوندىقتان ءبىز ءوز جۇمىسىمىزدى ءتىلدىڭ بەرەكەسىن الاتىن سويقان حابارلارمەن كۇرەسۋدەن باستاپ وتىرمىز. ال بولاشاقتاعى ءىس-قيمىلىمىزدى، اللا جازسا، ءومىر، ۋاقىت كورسەتەر...
— تەلەراديو كومپانيانىڭ تەحنيكالىق قۇرال-جابدىقتارى وسى زامانعى تالاپقا ساي بولماعاندىقتان، تەلەجۋرناليست اعايىندار ءوز مۇمكىندىكتەرىن كورسەتە الماي ءجۇر دەپ تە ايتادى...
— تەلەراديو كومپانيانىڭ تەحنيكالىق قۇرال-جابدىقتارمەن جابدىقتالۋى سىن كوتەرمەيدى، ارينە. تاس عاسىرىندامىز ءبىز. وركەنيەتتى ەلدەر الدەقاشان كومپيۋتەرلەرگە، جاساندى جەر سەرىكتەرىنىڭ كومەگىنە، ت.ب. وسى زامانعى حابار تاراتۋ مەن بايلانىس تاسىلدەرىنە كوشتى.
دەگەنمەن قولدا بار تەحنيكانى مەڭگەرۋىمىز دە ءماز ەمەس. اسىرەسە ۇلتتىق كادرلار جوققا ءتان. كۇنى كەشەگە دەيىن ۇلتتىق كادرلار دايارلايىق دەگەن پىكىر بولماعانعا دا ۇقسايدى. ونىڭ ءبىر ايعاعى — وپەراتور ت.ب. ءزارۋ ماماندىق يەلەرى اراسىندا قازاق جاستارى ىلۋدە ءبىر كەزدەسەدى. ولاردى دايىندايتىن وقۋ ورىندارى دا جوق. ەندىگى جەردە ءىستىڭ كوزىن وسىدان باستاۋ كەرەك.
قارا شاڭىراعىمىز دەپ جۇرگەن ءقازمۋ-دىڭ ءمۇيىزى قاراعايداي ۇستازدارى وزدەرىنىڭ تۇلەكتەرى قايدا جۇرگەنىن بىلە مە ەكەن؟ اسىرەسە جۋرناليست قىزدارى ءبىر-بىر ديپلومى بولسا دا ماشينيستكا، كوررەكتور، ءارى كەتسە قابىلداۋ بولمەسىندە حاتشى بولىپ كۇنىن كورىپ ءجۇر. سولار بەس جىل بويى مەملەكەت قارجىسى ەسەبىنەن وقىعان-توقىعانىن نەمەن اقتادى؟ فاكۋلتەت باسشىلارىنان ماماندارىنىڭ اتى بار دا، زاتى جوق دەپ كىم سۇراپ جاتىر؟ ۇلدارىمىزعا دا وكپە ارتامىز. ارينە، جۋرناليست دەگەن اتىنا لايىق قىزمەت ىستەپ، ءتىپتى ءىس باسىندا وتىرعاندارى بار. بۇل پىكىردى قىزدارىمىز تۋرالى دا ايتۋعا بولار. ءبىراق سان مەن ساپانىڭ ايىرماسى جەر مەن كوكتەي.
ءبىرىڭعاي تالاپ قويۋ وڭاي. كورپەمىزگە قاراي كوسىلىپ، جۋرناليستەرگە ءبىرسىدىرعى بولسا دا جاعداي جاساعىڭ كەلەدى. وسى تۇرعىدان كەلسەك، ۇياتتىمىز. تەلەديدار مەن راديو قىزمەتكەرلەرىنىڭ ەڭبەكاقىسى وتە تومەن. قالام اقىسى دا جارتىمسىز. ءتيىستى ورىندارعا تالاپ قويىپ وتىرمىز. ماقسات — قىزمەتكەرلەرىمىز ءوز ماماندىقتارىن ماقتانىش تۇتاتىنداي جاعدايعا (جالاقى، پاتەر ت.ب. تۇرعىدا) جەتۋ.
— ءسىز باسقارۋعا كەلىپ وتىرعان ۇجىمدا (تەلەراديو كومپانيادا) كونسەرۆاتورلىق، جىكشىلدىك كوڭىل كۇي باسىم دەپ ەستيمىز. وسى ۇجىممەن ءتىل تابىسىپ، قىزمەت ىستەۋ كەزىندە بۇرىنعى باسشىلارعا دا قيىن بولعانى بەلگىلى. ءىستى العا اپارۋ ءۇشىن بىلىكتى كادرلار قاجەت. كادرلار ىرىكتەۋدە وزگەرىستەر بار ما؟ جالپى، وسى ماسەلە توڭىرەگىندەگى ءسىزدىڭ كوزقاراسىڭىز قانداي ؟
— كونسەرۆاتوردىڭ تابيعاتىن اركىم ءارقالاي ءتۇسىنىپ ءجۇر. ال كونسەرۆاتور-جۋرناليست دەگەنىمىز قوساق اراسىندا جۇرەتىن، تاپتاۋرىن جولىنان اينىمايتىن، ايلار، جىلدار وتكىزىپ ەفيرگە ءبىر شىعاتىن جاندار دەپ تۇسىنەمىن. شىن دارىندى جۋرناليست كونسەرۆاتور بولا المايدى. ويتكەنى ول ۇدايى جاڭالىققا ۇمتىلىپ وتىرادى.
ءيا، اتتىڭ جەمىن جەپ، تاي-قۇلىنداي ويناق سالىپ جۇرگىسى كەلەتىندەر دە جوق ەمەس. ءوز تالابىن باسقا جەردە، باسقا ءبىر كاسىپتە سىناپ كورسىن، ولاردان ارىلۋ كەرەك. قازاقتىڭ بالاسى عوي، جۇرە بەرسىن دەگەندەي ىمىراشىلدىققا قارسىمىن. ءبىز وعان بارساق، ءىس ولەدى، حالىقتىڭ مۇددەسى ولەدى. وسى ەكى تاڭداۋدىڭ قايسىسى ءتيىمدى؟..
كەلەسى ءسوز جىكشىلدىك تۋرالى. ونى بار، نەمەسە جوق دەپ ايتا المايمىن. دەگەنمەن ۇزىلدى-كەسىلدى مالىمدەگىم كەلەدى. ونداي جىمىسقى ىس-ارەكەت بولىپ جاتسا، اياۋسىز تۇردە كۇرەسەمىز. ويتكەنى جىك بولعان جەردە ۇلكەن ماقساتقا جەتە المايسىڭ. جولدا قالا-تىنىمىز انىق.
ءقازىر زىمىران زامان. ءبىر ساتتىك شاباندىق قىمباتقا ءتۇسۋى مۇمكىن. تەلەراديونىڭ كادرلارىنا ورالىمدىلىق، ينەنىڭ كوزىنەن وتەتىن ىسكەرلىك كەرەك. كەيدە بۇرىنعى وداق، الەم حابارلارىن بىلاي قويعاندا، ءتول رەسپۋبليكامىزداعى جاڭالىقتاردى دەر كەزىندە قامتي الماي جاتامىز. ونىڭ سەبەبى ىزدەنىس جوق.
جاۋاپكەرشىلىك سەزىنە ءبىلۋ كەمشىن. مەن كەز كەلگەن زامانداسىم سياقتى، تەلەراديودا، عاسىرىمىزدىڭ وسى جەتەكشى اقپارات قۇرالدارىندا حالىقتىڭ مۇددەسىن ويلايتىن جاناشىر ازاماتتار جۇمىس ىستەگەنىن قالايمىن.
— ءسىزدى قازاقستان جۋرناليستيكاسى تاريحىنداعى پايعامبارلاردىڭ ءبىرى دەپ ايتىپ ءجۇر. تۇڭعىش جازعان ماقالاڭىز ەسىڭىزدە مە؟
— پايعامبار دەگەن سوزبەن ويناۋ كۇنا بولار. ءوزىمدى قولىنان قالامى تۇسپەي كەلە جاتقان جۋرناليستەردىڭ ءبىرىمىن دەپ ەسەپتەيمىن. جالپى وقىرمانعا تۇسىنىكتى بولۋى ءۇشىن ءومىربايانىمدى ازدى-كوپتى ايتا كەتەيىن. اكەم مۇرتازا 1937 جىلعى ستاليندىك رەپرەسسيانىڭ قۇربانى بولىپ كەتتى. ينتەرنات قابىرعاسىندا ءجۇرىپ 1950 جىلى جامبىل قالاسىنداعى جامبىل اتىنداعى قازاق ورتا مەكتەبىن بىتىرگەن سوڭ، اۋەلى ماسكەۋ پوليگرافيا ينستيتۋتىندا، ءۇشىنشى كۋرستان باستاپ ماسكەۋدىڭ مەملەكەتتىك لومونوسوۆ اتىنداعى ۋنيۆەرسيتەتىندە وقىپ، جۋرناليستيكا فاكۋلتەتىن 1955 جىلى ءبىتىرىپ شىقتىم. سول جىلداردىڭ وزىندە-اق باشقۇرت جازۋشىسى مۇستاي كارىمنىڭ «ءبىزدىڭ ءۇيدىڭ قۋانىشى» اتتى پوۆەسىن، ل.لاگاننىڭ «حوتتابىچ كارت» اتتى كوركەم شىعارماسىن قازاقشاعا اۋداردىم. جەكەلەگەن اڭگىمەلەرىم مەرزىمدى باسپاسوزدە جاريالانىپ ءجۇردى. ال تۇڭعىش ماقالام ءوزىم ادەبي قىزمەتكەرى بولعان «لەنينشىل جاس» (كازىرگى «جاس الاش») گازەتىندە جارىق كوردى.
— وي قۋعان ادامعا ءبىرقالىپتى كوڭىل كۇيدە بولۋ قيىن. كەيدە جۇدەپ-جادايتىن ۋاقىتىڭىز بولماۋى مۇمكىن ەمەس قوي. سونداي ساتتەردە نەنى ويلاپ قامىعاسىز؟
— مەندە قامىعۋ دەگەن بولمايدى. جۇدەپ-جاداي بەرەتىن بولساق، الدەقاشان سۋ تۇبىنە كەتىپ قالعان بولار ەدىك. مەندە ءتۇرلى قيىنشىلىقتارمەن كۇرەسە ءبىلۋ دەگەن ۇعىم بار. بوركەمىك بولۋ — كىسى سۇيەر قىلىق پا؟
— ۇزاق مەرزىمدى سيپاتىمەن ەرەكشەلەنەتىن « ۇلت جانە سانا» اتتى جاڭا تەلەحابار اشىلىپ، ونىڭ العاشقى قانات قاقتىعىسىنا قاتىستى جۇرتشىلىق جىلى پىكىر بىلدىرۋدە. اۆتورى ءارى جۇرگىزۋشىسى رەتىندە وسى حاباردىڭ دۇنيەگە كەلۋىنە قانداي وي تۇرتكى بولعانىن ايتا كەتسەڭىز ؟
— ورتالىق ەزگى تۇرمىسىمىزدى عانا ەمەس، بەلگىلى ويدى قايتالاپ ايتىپ جاتقان دا شىعارمىن، سانامىزدى دا تۋرالاتىپ كەتتى. ءسوز بولىپ وتىرعان حاباردىڭ ماقساتى — سانانى وياتۋ. كەشەگى ءمىرجاقىپ ت.ب. زيالىلارىمىز «ويان، قازاق!» — دەپ بەكەر شىرىلداعان جوق. ولاردىڭ جانايقايىن سول زاماننىڭ ۇردا-جىق، ارزان ۇراندارى تۇنشىقتىرىپ تاستادى. ەلۋ جىلدا ەل جاڭا. ءقازىر زامان باسقا بولعانىمەن، تەمىرقازىق ىسپەتتى تالاپ-تىلەك سول كۇيىندە تۇر. ەلىمىز تاۋەلسىزدىك السا دا، قۇلدىق، ماڭگۇرتتىك پسيحولوگيادان ارىلا الماي كەلەمىز. ەركىن ويلاپ، ەركىن ارەكەت جاساۋ ءالى دە قات. ەڭ اۋەلى سىرتتان تاڭىلعان كەسىر-كەساپاتتان تازارعان ءجون. سونىڭ ءبىرى — جۇزگە ءبولىنۋ. اباي ايتقان عوي: «ءبىرىڭدى، قازاق، ءبىرىڭ دوس، كورمەسەڭ ءىستىڭ ءبارى بوس» دەپ. ءبىز دەموگرافيا تۇرعىسىنان وراسان اپاتقا ۇشىراعان حالىقپىز. سوندىقتان كوپ بالالى اتا-انانى ناسيحاتتاپ، ولارعا ناقتى كومەك-قولعابىس جاساۋ كەرەك. ءتىل، ءدىن، ءسالت-داستۇر، بالا تاربيەسى، ت.ب. ءبىرىنشى كەزەكتە قولعا الاتىن ماسەلەلەر از با؟ مىنە، وسىنداي كوكەيكەستى تاقىرىپتاردى قوزعاپ، «ۇلت جانە سانا» ايدارى اياسىندا جۇيەلى جۇمىس جاساۋ ويدا بار. حالىقپەن ديدارلاسىپ، سول حالىقتىڭ تەگەۋرىندى وي-پىكىرىنەن قۋات الىپ، كوشىمىزدى تۇزەگەنگە نە جەتسىن؟!
اينالىپ كەلگەندە، ءوزىن قازاقستان ازاماتىمىن دەپ سانايتىن ءاربىر ۇل-قىزىمىز، مەملەكەتىمىزدىڭ وركەنيەتتى ەلدەر قاتارىنا قوسىلۋىنا سەپتەسسىن. سول كۇندى جاقىنداتۋعا كىزمەت جاساسىن. ءوزىم داعى وسى تالاپ ۇدەسىنەن تابىلعىم كەلەدى. سونىڭ ءبىر جولى — «ۇلت جانە سانا» تەلەحابارى دەپ تۇسىنەمىن.
— كەزىندە جاس جۋرناليست، جاس جازۋشى بولدىڭىز. قولىنا قالام ۇستاپ جۇرگەن جاستارعا عيبرات بولاتىنداي اڭگىمە ەستىگىمىز كەلەدى...
— كورەتىن كوز بولسا، عيبرات الاتىن ادامدار ارامىزدا، اسىرەسە اۋىلدا مول دەپ ويلايمىن. ال ءوزىمدى ۇلگى تۇتىپ، كورنەكتى قۇرال ەسەبىندە ۇسىنعىم كەلمەيدى. وتاندى ءسۇيىپ، ءبىر كەرەگىنە جاراپ جاتساق، قانەكي! «سەن دە ءبىر كىرپىش دۇنيەگە، كەتىگىن تاپ تا بار قالان»، — دەپتى ۇلى اقىن. ابايدان وتكىزىپ ايتۋ مۇمكىن ەمەس.
— ءسىز بالىقشىسىز با، اڭشىسىسىز با ؟
— اڭگىمە دەمالىس تۋرالى بولار. ىلگەرىدە سۋرەتشى اۋباكىر سمايىلوۆ اعام بىر-ەكى رەت ىلەنىڭ بويىنا ەرتىپ اپارعانى بار. ول ءبىر جاقسى كۇندەر، ارينە. مەن جالپى تاۋعا شىققاندى ۇناتامىن. تاڭمەن تالاسا تۇرىپ، اتقا ءمىنىپ دالانى تاماشالاعان دا ءبىر عانيبەت!.. ءبىراق قۋ تىرشىلىك باس بۇرعىزا بەرمەيدى. ونىڭ بەر جاعىندا كوڭىل كوتەرۋدەن باسقا دا ماڭىزدىراق ىستەر مەن مۇندالاپ كۇتىپ تۇرادى.
— ويدى وي قوزعايدى عوي. حالىق جازۋشىسى، دراماتۋرگ، پۋبليسيست، قازاقستان حالىق دەپۋتاتى شەرحان مۋرتازا اعامىزدى استانادا ۇيسىز-كۇيسىز جۇرگەن قازاق جاستارىنىڭ تاعدىرى دا الاڭداتادى ەكەن. سونىڭ ءبىر مىسالى — قازان ايىندا جاسوسپىرىمدەر تەاترىندا تۇساۋكەسەرى بولعان «جەتىم بۇرىش» اتتى پەساسى. «ان-تار اۋىزعا ۇيات، — دەدى ول. — الماتىداعى قازاق حالقىنىڭ ۇلەس سالماعى 20 پايىزدىڭ ءسال ۇستىندە. ءقازىر شەتەلدەن قوناقتار اعىلىپ كەلۋدە. سولار استاناعا قاراپ قازاقستان جايلى پىكىر تۇيەدى. الدى/5-20 جىل بويى كەزەگىن كۇتىپ، بالا-شاعاسىمەن ءالى دە كوشىپ-قونىپ جۇرگەن قازاق جاستارىنا نەگە ارتىقشا جەڭىلدىك جاساي المايمىز؟ ارتىقشىلىق جاستارىمىزدىڭ تۇرمىسىن باسقا ۇلت وكىلدەرىن قۇرايتىن قاتار-قۇربىلارىمەن ءبىرشاما تەڭگەرۋ ءۇشىن قاجەت.
ۇكىمەتتى ايىپتاي بەرۋ قيىن. ۇكىمەت كەدەي. تولىپ جاتقان تەسىكتەرى بار. قازىنا قالتاسى توعايىڭقىراسا، جاقسى كۇندەرگە دە جەتەرمىز. ءبىراق تۇرعىنجايعا ايرىقشا مۇقتاج جاستارعا ۇلتاراقتاي جەر ءبولىپ بەرۋدى داۋ-دامايسىز-اق شەشۋگە بولار ەدى دەپ ويلايمىن».
— ءقازىر ەشتەڭە دە جازىپ جۇرگەنىم جوق، — دەدى شەرحان اعامىز اڭگىمەسىن ودان ءارى جالعاستىرىپ. — كۇندەردىڭ كۇنىندە كەزەكتى دەمالىس الارمىن. سول كەزدە قالام-قاعازىمدى سايلاپ، «قىزىل جەبە» رومانىنىڭ «تامۇق» اتتى سوڭعى كىتابىن اياقتاعىم كەلەدى.
— تاعى ءبىر سۇراق. جاقسىعا ەلىكتەۋ سالتىمىز عوي. ءسىز سياقتى ەل-حالىق قۇرمەتىنە بولەنۋدىڭ، جاستار ايتاتىنداي، شەر-اعا بولۋدىڭ قۇپياسى بار ما ؟
— «بولامىن دەسەڭىز بولىڭىز» دەگەن ەكەن ءبىر ويشىل. دەگەنمەن مەن دە پەندەمىن. مەندەي جازۋشىلار بار. مەنەن دە وتكەن جازۋشىلار، ۇلكەن قايراتكەرلەر بار. ىرىس الدى — ىنتىماق. ماسەلە ءبىر جاعادان باس، ءبىر جەڭنەن قول شىعارىپ، اسپانكوك تۋىمىزدىڭ مارتەبەسى بيىك بولا بەرۋىنە اتسالىسۋدا دەپ تۇسىنەيىك.
ماقالانى وسىمەن اياقتاسا دا بولار ەدى.
شەر-اعا ءوزى ۇسىنىس جاساپ، ەسىك پەن توردەي كولىگىمەن رەداكسياعا جەتكىزىپ تاستاماق بولدى. شاھاردىڭ سول تۇسىندا شارۋاسى دا بار ەكەن. جول-جونەكەي شاكەڭنىڭ شىعارماشىلىق ءومىربايانى مەن كوعامدىق قىزمەتى حالقىنىڭ كوز الدىندا ەتىپ جاتقانىن باعامداپ، ءسىرا، شەر-اعا بولۋدىڭ ءبىر قۇپياسى — جاسى ۇلكەنگە قۇرمەت، كىشىگە ىزەت كورسەتە بىلەتىن ادامگەرشىلىگىندە بولسا كەرەك دەگەن وي كەلدى. بۇرىنعىلار «ۇلىق بولساڭ — كىشىك بول!» — دەپ ءبىلىپ-اق ايتقان عوي.
اڭگىمەلەسكەن ازات اكىم ۇلى،
سۇحباتتىق» ارناۋلى ءتىلشىسى.
1992 جىل
You Might Also Like
-
باسقا ەلگە بارىپ، ونى ءبىر اپتانىڭ ىشىندە كورىپ-بىلىپ، تۇپ-تۇگەل تانيمىن دەۋ، ارينە، ابەستىك.تۇركيانى تۇگەل ءبىلىپ-تانۋ ءۇشىن ەڭ قۇرىعاندا ءبىر جىل، تىم بولماسا قالتايدىكى سياقتى ءبىر اي كەرەك.
-
جامبىل جاكەمىز قايتىس بولاردان ءسال بۇرىن ءوزىنىڭ بەل بالاسى تەزەكبايدى شاقىرتىپ الىپ:
