InfoHub Logo

Алматыдағы №7 Қалалық клиникалық аурухананың емханасында Дүниежүзілік ауыз қуысы денсаулығы күніне орай маңызды шара ұйымдастырылды. Бұл туралы Infohub.kz ақпарат агенттігі хабарлайды.

Акцияны дәрігер-стоматолог Арайлым Әбусейітова өткізді. «Болашаққа сау тіспен» атты шара аясында тіркелген тұрғындарға ауыз қуысын күту ережелері туралы ақпараттық материалдар таратылды.

Тіс тазалаудың дұрыс әдістері мен профилактика

Шарада тіс тазалаудың дұрыс техникасына, гигиеналық рәсімдердің тұрақтылығына, сондай-ақ тіс жегі мен қызыл иек ауруларының алдын алуға ерекше назар аударылды.

Мамандар тісті күніне екі рет – таңертең ас ішкеннен кейін және кешке ұйықтар алдында, кем дегенде 2-3 минут уақыт бөліп тазалау керектігін еске салды. Барлық тіс беттерін, тілді тазалау, тіс жібін қолдану және тіс щеткасын әр үш ай сайын ауыстыру маңызды екені айтылды.

Балаларға арналған ерекше кеңестер

Балaлар үшін бұл ұсыныстар ойын түрінде берілді. Оларға тіс щеткасын 45 градус бұрышпен ұстау ережесі де үйретілді.

Дені сау тіс үшін диета мен күтім

Сонымен қатар, тұрғындарға тәттіні шектеу, рационға көбірек көкөніс пен сүт өнімдерін қосу, әр тамақтан кейін ауызды шаю ұсынылды.

Медицина қызметкерлері мұндай акциялардың денсаулық мәдениетін қалыптастыруға және стоматологиялық аурулардың алдын алудың маңыздылығы туралы халықтың хабардарлығын арттыруға ықпал ететінін атап өтті.