InfoHub Logo

Ақтаудағы әскери бөлім командирінің қызметіндегі немқұрайлылығы салдарынан жас сарбаз қаза тапты. Бұл туралы Бас прокуратураның мәліметіне сүйеніп, Infohub.kz ақпарат агенттігі хабарлайды.

Қазіргі уақытта Ақтау гарнизонындағы әскери бөлімдердің бірінің командирінің қызметтік міндеттерін орындамауы бойынша қозғалған қылмыстық іс бойынша тергеу аяқталды. Бұл жағдай 17 ақпанда болған.

Сарбаздың өліміне командирдің салғырттығы себеп болған

Тергеу барысында бөлім командирінің әскери жарлықтар мен бұйрықтарда көрсетілген қажетті шараларды қабылдамағаны анықталды. Ол жеке құрамды бақылау мен қаруды қолдану тәртібін қадағаламаған, бұл трагедияға әкеліп соқтырды.

Әскери прокурорлар мен жедел-тергеу тобының жұмысы нәтижесінде жеткілікті дәлелдемелер жиналып, қажетті сараптамалар жүргізілді. Қылмыстық іс мәні бойынша қарау үшін сотқа жіберілді.

Офицерлер қызметінен босатылды

Бұл оқиғадан кейін барлау-шабуыл батальонының командирі, оның орынбасары және рота командирі қызметтерінен босатылды. Сонымен қатар, 10 лауазымды тұлға тәртіптік жауапкершілікке тартылды.

Бас әскери прокуратура әскери қызметшілердің өліміне әкеп соқтыратын қылмыстар үшін жазаның бұлтартпау принципін қамтамасыз ету бойынша жұмысты жалғастыратынын мәлімдеді.