InfoHub Logo

Әзербайжан президенті Ильхам Алиев Қазақстан президенті Қасым-Жомарт Тоқаевқа алғыс айтты. Бұл туралы ол X әлеуметтік желісінде (бұрынғы Twitter) жазды.

Бұл туралы Infohub.kz ақпарат агенттігі хабарлайды.

"Иранның Нахичеванға жасаған соққысын айыптағаны және Әзербайжан мен Қазақстан арасындағы бауырлас әрі одақтас қарым-қатынас рухында елімізді қолдағаны үшін президент Қасым-Жомарт Тоқаевқа алғысымды білдіремін", - деп жазды Алиев.

Иранның шабуылы және Қазақстанның ұстанымы

Еске сала кетейік, 5 наурызда Ираннан ұшырылған дрондар Нахичеван қаласы маңындағы әуежай аумағына құлаған болатын. Әзербайжан Сыртқы істер министрлігі әуежай ғимаратының зақымдалғанын және бірнеше бейбіт тұрғынның жарақат алғанын хабарлады.

Иранның ұшқышсыз ұшақтарының Нахичеван әуежайына жасаған шабуылына байланысты Қасым-Жомарт Тоқаев өз ұстанымын білдірді. Ол бұл әрекетті "бауырлас, одақтас Әзербайжанға" қарсы жасалған әрекет деп қатаң айыптады.

"Сонымен қатар, Мемлекет басшысы Иранмен бірлесіп аталған жағдайды мұқият тергеуге және аймақтағы шиеленістің ушығуына жол бермеу үшін жанжалды жағдайды дипломатиялық жолдармен реттеуге үміт білдірді", - делінген хабарламада.

Иранның жауабы

Тегеран Әзербайжанға қарсы дрон ұшырғанын жоққа шығарды. Иран Бас штабының мәліметінше, мұндай әрекеттерді бұрын Израиль мұсылман елдері арасындағы қарым-қатынасты нашарлату мақсатында жасаған.

Өз кезегінде Әзербайжан Иранға жауап қайтару шараларымен қорқытты.