InfoHub Logo

Блогер Айғаным Мырзахметова, яғни Айка есірткі сақтағаны және жеңгетайлық жасағаны үшін сотталып, кейін бостандыққа шыққан еді. Енді оның түрмеге қайта оралмауы мүмкін деген мәселе қоғамда қызу талқыланып жатыр.

Бұл туралы Infohub.kz ақпарат агенттігі хабарлайды.

Айка лақап атымен танымал блогер 2024 жылдың мамырында сот үкімімен бас бостандығынан айырылған болатын. Алайда, кішкентай баласының болуына байланысты 2025 жылдың қараша айында түрмеден уақытша босатылған. Кейіннен, 2025 жылдың қыркүйегінде Қылмыстық кодекстегі өзгерістерге сәйкес, сот оның жазасын өтеуді 2 жылға кейінге қалдырды. Осы уақыт ішінде ол пробациялық бақылауда болады.

Қоғамдағы сұрақтар мен заңгер пікірі

Блогердің жазасының жеңілдетілуі қоғамда түрлі пікір тудырды. Ішкі істер министрі Ержан Сәденов мерзім аяқталған соң жаза жалғасатынын айтқанымен, Ішкі істер министрлігі бұл мәселенің сот құзыретінде екенін нақтылады. Министрлік ресми жауабында: «Мерзім аяқталғаннан кейін жазаның түрін өзгерту сот органдарының құзыретіне жатады. Сот оның тәртібі мен қойылған талаптарды сақтауын ескере отырып үкімнің одан әрі орындалуы туралы шешім қабылдайды», – деп хабарлады.

Заңгер Абзал Қасымжановтың айтуынша, егер сотталған адам пробациялық бақылау талаптарын бұзбаса, сот оны жазадан толық босатуы немесе жеңілдетуі мүмкін. Бұл гуманистік норма, әсіресе, кішкентай балалары бар әйелдерге қатысты қолданылады. Алайда, ауыр қылмыстар жасағандарға бұл жеңілдік қолданылмайды.

Егер Айка пробациялық талаптарды бұзса, оны қайтадан колонияға жіберу туралы ұсыныс жасалуы мүмкін. Ал егер барлық шартты орындаса, сот оны толық босату немесе жазаны жеңілдету туралы шешім қабылдауы ықтимал.