InfoHub Logo

Алматыдағы Медеу аудандық сотында бұрынғы басшы Ольга Абдыгаппароваға қатысты сот талқылауы өтті. Мемлекеттік айыптаушы оны алаяқтық, лауазымын асыра пайдалану және бөтен мүлікті иемдену баптары бойынша кінәлі деп танып, 8 жылға бас бостандығынан айыруды сұрады. Сондай-ақ, оның 10 жыл бойы белгілі бір лауазымдарды атқару құқығынан айыру ұсынылды.

Бұл туралы Infohub.kz ақпарат агенттігі хабарлайды.

Істің мән-жайы

Қозғалған қылмыстық іс Алматыдағы Esentai City тұрғын үй кешенінің құрылысымен және AV-Construction компаниясының қызметімен байланысты. Тергеу нұсқасы бойынша, Абдыгаппарова компанияны басқарған кезеңде заңбұзушылықтар орын алған. Бұған дейін осы жоба аясында оның күйеуі Алмас Абдыгаппаров та сотталған болатын.

Абдыгаппарованың қорғаушылары не дейді?

Ольга Абдыгаппарова өзіне тағылған айыптармен келіспейтінін мәлімдеді. Қорғаушы тараптың айтуынша, компанияның қаржылық қиындықтары оның басшылық қызметке келгенге дейін, яғни Елдос Коспаевтың тобы басқарған кезде басталған. Адвокаттар сонымен қатар, даулы мәселелердің кейбірі қылмыстық емес, азаматтық-құқықтық сипатта екенін алға тартты.

Елдос Коспаевтың ісі

Елдос Коспаевты кәсіпкерлердің бизнесін рейдерлік жолмен тартып алумен айналысқан ұйымдасқан қылмыстық топтың көшбасшысы ретінде атайды. Оның топ мүшелері кәсіпкерлерді қорқытып, табыстарын жымқырған. Бір жыл бұрын Коспаевтың қылмыстық тобына қатысты сот үкімі шыққан. Онда Коспаев ағайындылары мен олардың сыбайластары ұйымдасқан қылмыстық топ құрғаны, бопсалау және мүліктерді заңсыз иемденгені үшін кінәлі деп танылып, әртүрлі мерзімге бас бостандығынан айырылған. Елдос Коспаев өзі 15 жылға сотталған.