InfoHub Logo

Шымкентте мемлекеттік бағдарлама аясында бөлінген қаржыны жымқырғандарға қатысты қылмыстық іс бойынша тергеу аяқталды. Бұл туралы Қаржы мониторингі агенттігі хабарлады.

Тергеу және негізгі күдіктілер

Тергеу мәліметтері бойынша, «Ауыл шаруашылығын қаржылай қолдау қоры» АҚ басқармасының бұрынғы төрағасы Омаров Ж.Д. өзіне қарасты компаниялар мен бақылаудағы ұйымдар арқылы, соның ішінде Green Mart Kazakhstan ЖШС-мен бірге қаржы жымқыру схемасын ұйымдастырған.

Тауарлар мен қызметтерді сатып алу бәсекелессіз, негізінен бір жеткізушіден жүргізілген. Сонымен қатар, жабдықтар мен жұмыстардың құны жасанды түрде асырылып, кейбір іс-шаралар мүлдем орындалмаған.

Осыған қарамастан, орындалған жұмыстар туралы жалған актілер ресімделіп, солардың негізінде бюджет қаражаты аударылған.

Шығын және заңсыз субсидиялар

Нәтижесінде мемлекетке 430 миллион теңгеден астам қаржылай шығын келтірілген.

Бұған қоса, агроөнеркәсіп кешені саласында инвестициялық субсидияларды заңсыз алу фактілері анықталды. Ол үшін ауыл шаруашылық кооперативтері құрылып, олар арқылы бақтарды дамыту және шығындарды өтеу үшін қаржыландыруға өтінімдер берілген.

Бұл құрылымдардың шоттарына 327 миллион теңгеден астам қаржы аударылған. Алайда, қаражаттың шамамен 20 пайызы ғана мақсатты түрде пайдаланылған, ал 250 миллион теңгеден астамы сенімді тұлғалар арқылы қолма-қол ақшаға айналдырылып, мақсатсыз жұмсалған.

«Соттың санкциясымен құны 1 миллиард теңгеден асатын 108 гектар жер теліміне тыйым салынды. Күдікті Омаров Ж.Д. қамауға алынды. Қылмыстық іс сотқа жіберілді», - деп хабарлады ҚМА.

Естеріңізге сала кетейік, 2025 жылдың тамыз айында осы іс бойынша қордың бұрынғы басқарушы директоры Искаков М.К. және Green Mart Kazakhstan ЖШС басшысы Сазынбек Р.Б. 8 жылға бас бостандығынан айырылып, 4 автокөлігі тәркіленген болатын.

Ауыл шаруашылығын қаржылай қолдау қорының бұрынғы басшысы 2025 жылдың қазан айында ұсталған еді.