InfoHub Logo

Украинада элиталық құрылыс саласында 460 миллион гривенді (шамамен 4,8 миллиард теңге) заңдастырумен айналысқан ұйымдасқан топ әшкереленді. Бұл іске Украина президенті кеңсесінің бұрынғы басшысы Андрей Ермак та тартылған.

Бұл туралы Infohub.kz ақпарат агенттігі хабарлайды.

Ұйымдасқан топтың әрекеті

Украинаның Сыбайлас жемқорлыққа қарсы ұлттық бюросы (НАБУ) Андрей Ермактың Киев маңындағы элиталық құрылыс жобаларында 460 миллион гривенді жымқырған ұйымдасқан топқа қатысы бар деген күдікке ілінгенін хабарлады. Алайда, «Украинская правда» басылымының мәліметінше, Ермак өзінің кінәсіз екенін айтып, тек бір көлігі мен бір пәтері бар екенін алға тартқан.

«Мидас» операциясы

2025 жылдың 10 қарашасында НАБУ және Сыбайлас жемқорлыққа қарсы іс-қимыл прокуратурасы (САП) мемлекеттік сектордағы стратегиялық кәсіпорындарға, атап айтқанда «Энергоатом» АҚ-на ықпал ету бойынша сыбайлас жемқорлық схемасын әшкерелеу операциясын бастаған. Бұл операция «Мидас» деп аталды.

2025 жылдың 28 қарашасында НАБУ қызметкерлері Ермактың үйіне тінту жүргізгеннен кейін бірнеше сағаттан соң президент Владимир Зеленский оны қызметінен босатты.

Қылмыстық топтың қызметі

САП бұл қылмыстық ұйымның негізгі қызметі «Энергоатом» компаниясымен жасалған келісімшарттардың құнынан 10-15 пайызы көлемінде пара алу болғанын мәлімдеді. Құқық қорғау органдарының анықтауынша, заңсыз жолмен алынған қаражатты заңдастырумен айналысқан топтың кеңсесі Киевтің орталығында орналасқан. Олар арқылы шамамен 100 миллион АҚШ доллары өткен.

Андрей Ермак 2020 жылдың ақпанынан бастап Украина президенті кеңсесін басқарды. Ол Владимир Зеленскийдің ең жақын серіктерінің бірі және елдегі екінші ықпалды тұлға саналды.