InfoHub Logo

Әлеуметтік желіде Ақтөбе облысы Қарғалы ауданы әкімінің орынбасарының полиция қызметкерлерімен болған жанжалға қатысты видео тарады. Видеода шенеунік пен оның жүргізушісі жол полициясының тоқтату туралы талабын елемей, кейін оларға дөрекі сөйлегені байқалады. Алайда, облыстық полиция департаменті жүргізген тексеріс нәтижесінде әкім орынбасарының бұл іс-әрекетінде тәртіп бұзушылық белгілері анықталмады.

Бұл туралы Infohub.kz ақпарат агенттігі хабарлайды.

Оқиғаның мән-жайы

Желіде тараған видеода полиция қызметкерлері қызметтік көлікті тоқтатып, оның заңдылығын тексермек болған. Көлік жүргізушісі тоқтау туралы талапты орындамай, кейін полицияға дөрекілік танытқан. Көлікте жолаушы ретінде отырған аудан әкімінің орынбасары да полицияның әрекетіне наразылық білдіріп, «Мені тоқтатуларың қате ғой. Дамир, сенімен кейін сөйлесеміз. Мен саған қорқытып тұрған жоқпын», - деп айтқан.

Полицияның ресми жауабы

Ақтөбе облыстық полиция департаментінің мәліметінше, патрульдік қызметкерлер қызметтік көліктің түнде қолданылу заңдылығын тексеру үшін тоқтатқан. Жүргізуші полицияның заңды талаптарын елемей, қашып кетпек болған. Кейін көлік тоқтатылған соң, ол қызметкерлердің жұмысына кедергі келтіріп, дұрыс емес мінез-құлық көрсеткен. Нәтижесінде жүргізуші әкімшілік жауапкершілікке тартылды.

Полиция департаментінен хабарлағандай, көлікте жолаушы ретінде отырған Қарғалы ауданы әкімінің орынбасарының іс-әрекетінен қоғамдық тәртіпті бұзу белгілері анықталмаған. Дегенмен, бұл факті бойынша материалдар мемлекеттік қызмет істері жөніндегі уәкілетті органға жіберіліп, әкім орынбасарының тәртіптік жауапкершілігі мәселесі қаралатын болады.

Ақтөбе облысы әкімдігінің хабарлауынша, бұл оқиғада мемлекеттік қызметкердің кінәсі жоқ. Шенеуніктің полицияға қатысты айтқан сөздеріне қатысты қызметтік тексеру жүргізілетіні немесе жүргізілмейтіні әкімдікте нақтыланбады.