InfoHub Logo

АҚШ-тың Денвер халықаралық әуежайында жолаушылар ұшағының ұшу жолағындағы адамды қағып кетуі салдарынан қайғылы оқиға болды. Frontier Airlines әуе компаниясына тиесілі Airbus A321 ұшағы Лос-Анджелес бағытында ұшуға дайындалып жатқанда, жолақта жүрген адамды басып озды.

Бұл туралы Infohub.kz ақпарат агенттігі хабарлайды.

Оқиға 8 мамыр күні кешкі уақытта тіркелген. Соққыдан адам сол жерде қаза тапты. Сонымен қатар, ұшақ қозғалтқышында қысқа уақытқа өрт шыққаны хабарланды. Өрт сөндіру қызметі жалынды тез арада жойды.

Ұшақта 224 жолаушы мен 7 экипаж мүшесі болған. Оқиғаның ауырлығын сезінген ұшқыштар рейсті тоқтату туралы шешім қабылдады.

Экипаж бен диспетчер диалогы

Әлеуметтік желіде экипаж бен диспетчер арасындағы байланыс жазбасы тарады. Онда ұшқыш:

«Диспетчер, Frontier 4345. Біз ұшу жолағында тоқтап тұрмыз… Біз біреуді қағып кеттік… қозғалтқышта өрт шықты», – деп хабарлаған. Кейін экипаж командирі ұшақ ішінде түтін пайда болғанын айтып, жолаушыларды шұғыл эвакуациялау қажеттігін жеткізді.

Борттағы адамдар үрлемелі траптар арқылы ұшу жолағына түсіріліп, арнайы автобустармен терминалға жеткізілді. Алдын ала мәліметтер бойынша, бір жолаушы жеңіл жарақат алған. Ұшақтағы барлық адам медициналық тексеруден өтті.

Тергеу басталды

Frontier Airlines компаниясы оқиғаның себеп-салдарын анықтау үшін әуежай әкімшілігімен және қауіпсіздік қызметтерімен бірлесіп жұмыс істеп жатқанын мәлімдеді. Қазіргі таңда Денвер полициясы мен АҚШ-тың Ұлттық көлік қауіпсіздігі кеңесі тергеу жүргізіп жатыр. Мамандар адамның ұшу жолағына қалай кіріп кеткенін анықтау үшін әуежай аумағындағы қоршаулар мен қауіпсіздік жүйесін мұқият тексеруде.