InfoHub Logo

Алматы облысы, Алмалыбақ ауылында болған төтенше жағдайда 10 жасар баланың өмірін құтқарып қалған Серікбек Сақайбеков ерлік танытты. Оқиға бірнеше күн бұрын орын алған: көшеде жалғыз келе жатқан баланы қаңғыбас иттер қуып, шабуыл жасай бастаған. Қауіпті көрген Серікбек батылдық танытып, еш ойланбастан көмекке ұмтылып, баланы иттердің арасынан алып шыққан.

Ол баланы қауіпсіз жерге жеткізіп, алғашқы медициналық көмек те көрсеткен. Баланың өміріне төнген қауіп осылайша сейілді. Куәгерлердің айтуынша, егер Сақайбеков дер кезінде араласпағанда, қайғылы жағдай орын алуы мүмкін еді.

Азаматтың бұл ерлігі көпшіліктің көңілінен шығып, жұрттың ыстық ықыласына бөленді. Белсенді азаматты жергілікті демеушілер арнайы алғыс хатпен және ақшалай сыйлықпен марапаттады.

 Марапаттау рәсімінде сөз сөйлеген ауыл тұрғындары мен қоғам белсенділері Серікбектің бұл әрекетін – нағыз азаматтық ерлік деп бағалап, жас ұрпаққа үлгі етті.

 Қазіргі таңда қаңғыбас иттердің көбеюі мен қауіпсіздік мәселесі күн тәртібінде тұрғаны анық. Бұл оқиға жергілікті билікке де ой салуы тиіс.

Серікбек Сақайбековтің батылдығы – азаматтық жауапкершіліктің, адам өміріне бейжай қарамаудың көрінісі.