InfoHub Logo

Қазақстанда шағын және орта бизнес саны күрт азайды. Жыл басынан бері 64 мыңнан астам кәсіпорын жұмысын тоқтатты, олардың басым көпшілігі – жеке кәсіпкерлер.

Бұл туралы Infohub.kz ақпарат агенттігі хабарлайды.

Статистика не дейді?

Ұлттық статистика бюросының дерегінше, жыл басынан бері елімізде шағын және орта бизнес субъектілерінің 64,2 мыңы жұмысын тоқтатқан. Ең көп жабылу – жеке кәсіпкерлер арасында. Олардың саны шамамен 5%-ға азайған. Бұл көрсеткіш әсіресе сауда және көлік салаларында айқын байқалады. Бұл – дәстүрлі түрде шағын бизнес өкілдері көп шоғырланған салалар.

Неге мұндай жағдай орын алды?

Сарапшылар мұны екі негізгі себеппен түсіндіреді. Біріншісі – нарықтың «ағаруы». Бұрын салықты азайту үшін кәсіпкерлер өз бизнесін бірнеше ЖШС-ке бөліп жүрген. Алайда, қазір бақылау күшейіп, мұндай схемалар жойылып, артық ЖШС-тер жабылуда. Екінші себеп – халықтың тұтынуының азаюы. Сұраныс төмендеп, шағын бизнеске өмір сүру қиындап барады. Сауданың өсу қарқыны да бәсеңдеген. Өткен жылы бұл көрсеткіш шамамен 6% болса, биылғы жылдың басында 3,4% шамасында. Бұл тікелей кәсіпкерлерге әсер етеді: сатып алушылар азайса, табыс та азаяды, сәйкесінше, бизнес жабылуға мәжбүр болады.