ءسوز سوڭى
ۇلى وتان سوعىسىنىڭ اسا ءبىر قيىن-قىستاۋ كەزەڭىندە، اتاپ ايتقاندا، 1942 جىلى ەلىمىزدىڭ جاۋىنگەرلەرى مەن ەڭبەكشىلەرىنىڭ اسىرەسە بۇلاردىڭ ءىزباسارلارى — وسكەلەڭ جاس بۋىندارىنىڭ ءون بويىندا وپاسىز جاۋعا ىزبارلى اشۋ كەك سەزىمىن لاۋلاتىپ، ونىمەن اياۋسىز كۇرەسۋگە ۇمتىلدىرعان قازاق جازۋشىلارى مەن جۋرناليستەرىنىڭ شىعارمالارى اراسىندا قالىڭ بۇقارانىڭ نازارىن ەرەكشە اۋدارعان باۋبەك بۇلقىشيەۆتىڭ «كومسومولسكايا پراۆدا» جانە «سوسياليستىك قازاقستان» گازەتتەرىندە جاريالاعان پۋبليسيستيكالىق ماقالالارى بولدى. بۇل ءجايت ءقازىر بارشامىزعا ايان.
تالاپتى جاس قالامگەردىڭ «كومسومولسكايا پراۆدا» گازەتىنىڭ 1942—1943 جىلعى ساندارىندا جارىق كورگەن تەرەڭ ويلى تۋىندىلارى كەزىندە مۇحتار ومارحان ۇلى اۋەزوۆتى دە تولعانتىپ، جۇرەگىنە جىلى ۇيالاعان ەكەن. بۇل جونىندە اسىل اعامىز اسقار توقماعامبەتوۆ بىلاي دەيدى: «وتان سوعىسىنىڭ وتتى جىلدارىندا ءبىز الماتىدا كالينين كوشەسىندەگى بەسىنشى ۇيدە تۇراتىنبىز. مۇندا مۇحتار اۋەزوۆ، ءابدىلدا تاجىبايەۆ تا تۇردى. سوعىستا نە جانالىق بولىپ جاتقانىن بىرىمىزدەن ءبىرىمىز ءبىلىپ وتىرامىز.
ءبىر كۇنى مۇحاڭ ماعان تەلەفون سوعىپ:
— اسقار، سەن وقىدىڭ با؟ — دەدى. — «كومسومولسكايا پراۆدادا» باۋبەك بۇلقىشيەۆتىڭ «مەن ءومىر سۇرگىم كەلەدى » دەگەن ماقالاسى شىعىپتى. مەنىڭشە، وتە جاقسى جازىلىپتى. ول ءوزى سويلەمەپتى، جۇرەگىن سويلەتىپتى.
ونىڭ ءوزى ءبىر ەتە تالانتتى جىگىت ەكەن. شىركىن، سوعىستان امان قايتسا، جازۋشى بولايىن دەپ تۇرعان دارىن ەكەن. ءسوز ساپتاۋى، وي ءورىسى ەتە تەرەڭ جاتىر... ماعان قاتتى ۇنادى. كوزىمە جاس الدىم، كوڭىلىمدى بوساتتى».
باۋبەك بۇلقىشيەۆ تۋعان ەلىنە سوعىستان قايتىپ ورالمادى، 1944 جىلى فيەۆرال ايىنىڭ 3 كۇنى ۋكراينانى جاۋدان ازات ەتۋ ءۇشىن قيان-كەسكى ءبىر شايقاس كەزىندە ەرلىكپەن قازا تاپتى.
وقىرماندارعا ۇسىنىلىپ وتىرعان جاڭا جيناقتا مارقۇمنىڭ بارلىق، دەرلىك شىعارمالارىنا، حاتتارىنا جەكە-جەكە انىقتامالار بەرىلگەندىكتەن ءبىز مۇندا سولاردى قايتالاپ جاتپاي، ەڭ الدىمەن ونىڭ بۇرىن-سوڭدى جارىق كورگەن جيناقتارى تۋرالى ايتا كەتۋدى ءجون كورەمىز.
ونىڭ ەڭ العاشقى «زامان بىزدىكى» دەگەن كىتابى 1943 جىلدىڭ فيەۆرالىندە «نەمىس وككۋپانتتارىنا ءولىم كەلسىن! قىزىل اسكەر كىتاپحاناسى» دەگەن ايدارمەن جارىق كوردى. ونى قۇراستىرعان جانە رەداكسيالاعان عابيت مۇسىرەپوۆ بولاتىن. بۇعان باۋبەكتىڭ «ءومىر مەن ءولىم تۋرالى»، «مەن ءومىر سۇرگىم كەلەدى»، «زامان، جاستار، بىزدىكى»، «شىعىس ۇلىنا حات»، «تىڭدا، كاۆكاز» اتتى پۋبليسيستيكالىق ماقالالارى ەنگەن. (كولەمى 1،2 باسپا تاباق، تيراجى 10 مىڭ دانا).
العاشقى جيناعىمەن اتتاس ەكىنشى كىتابى 1948 جىلى جارىق كەردى. قازاقتىڭ بىرىككەن مەملەكەت باسپاسى شىعارعان، كولەمى 3 باسپا تاباق، تيراجى 10 مىڭ دانا. وندا قۇراستىرعان م. يمانجانوۆ، قارا سوزدەرىن ورىسشادان اۋدارعان ع. مۇسىرەپوۆ، رەداكتورى ع. مۇسىرەپوۆ دەپ كورسەتىلگەن. ءبۇل كىتاپشا ەكى بولىمنەن تۇرادى. ءبىرىنشى بولىمدە باۋبەكتىڭ ءار كەزدە جازعان 22 ولەڭى، ەكىنشى بولىمگە جوعارىدا اتالعان پروزالىق شىعارمالارىمەن قاتار جاڭادان «جاۋىزدىق پەن ماحاببات» اتتى پۋبليسيستيكالىق وچەركى جاريالانعان.
باۋبەك شىعارمالارىنىڭ ءۇشىنشى جيناعى «وشپەس ءومىر» دەپ اتالىپتى. ونى 1965 جىلى «جازۋشى» باسپاسى جارىققا شىعارعان. قۇراستىرعان ديحان ابىليەۆ، رەداكتورى م. سۇندەتوۆ، كولەمى 5،91 باسپا تاباق، تيراجى 12 مىڭ دانا. مۇندا اۆتوردىڭ تەك پروزالىق شىعارمالارى جاريالانعان. جوعارىدا اتالعان پۋبليسيستيكالىق ماقالا وچەركتەرىنە قوسا، العاش رەت «الماتى — قالام مەنىڭ» اتتى اياقتالماي قالعان رومانى باسىلعان.
عابيت اعامىز وسى جيناقتاعى «ەكى اۋىز سەز» اتتى شاعىن كىرىسپەسىندە بىلاي دەپ جازدى:
«سوعىس الدىنداعى سوڭعى جىلداردا باۋبەكتىڭ ولەڭدەرى كوبىنەسە «وكتيابر بالالارى» جۋرنالىندا (گازەتىندە س.ا.) باسىلىپ جۇرگەندىكتەن ۇلكەندەردىڭ نازارىن تارتا قويماعان ەدى. ءار قۇرالدىڭ وتكىرلىگىن، ءار كۇشتىڭ شاما-شارقىن اياۋسىز سىنار كەزەڭدە جاس تالانت سەرپىلە سىلتەپ كەتتى. ويلى جاستىڭ قۇنارلى ءسوزى بۇكىل سوۆەت ەلىنىڭ قۇلاعىنا 25 جىل بىرگە ءبىر باعىتتا وسىپ-ونگەن كەپ ۇلتتى اينىماس دوستىعىنىڭ ۇنىندەي ەستىلدى.
باۋبەك: «زامان بىزدىكى»، — دەيدى. باۋبەك مايدانداعى كازاك، جاستارىنىڭ اتىنان سويلەيدى. تەرەڭىرەك ويلانساڭىز، مۇنىڭ ەكەۋى دە ۇلكەن جاۋاپتىلىقپەن ايتىلاتىن سوزدەر. ىسىنە دە، كۇشىنە دە ەركىن سەنەتىن جاس جازۋشى بۇل جاۋاپتىلىقتان تايىنعان جوق. زامان جاستاردىكى ەكەنى داۋسىز عوي. ءبىراق، قانداي جاستاردىكى؟ جەلبۋاز؛ داۋرىقپا جاستاردىكى ەمەس، باۋبەك سياقتى ءونىمدى ەڭبەك يەسى دەپ تانىرلىق ونەرلى دە، ونەگەلى جاستاردىكى.
باۋبەكتىڭ وسى كىتاپشادا باسىلىپ وتىرعان ماقالالارىنىڭ قايسىسىن الساق تا، وتە ءبىر ەلەۋلى، ەرەكشە ءبىر ماعىنالى ماسەلەلەردى قوزعايدى. ونى قوزعاي العان جاستىڭ زامان بىزدىكى دەۋگە دە، جالپى جاستار اتىنان سويلەۋگە دە ابدەن قاقىسى بار...»
باۋبەك شىعارمالارىنىڭ ءتورتىنشى جيناعى «ادامزاتقا حات» دەگەن اتپەن «جالىن» باسپاسىنان 1977 جىلى جارىق كوردى. ونى قۇراستىرعاندار فيلولوگيا عىلىمدارىنىڭ كانديداتتارى راحمەتوللا ىدىرىسوۆ پەن ءرازيا رۇستەمبەكوۆا يمانجانوۆا، رەداكتورى د. يسابەكوۆ، كولەمى 11 باسپا تاباق، تيراجى 35 مىڭ دانا. مۇندا جوعارىدا اتالعان 1948 جىلى شىققان جيناققا ەنگەن ولەڭدەر جانە پروزالىق شىعارمالارى، كەزىندە «لەنينشىل جاس»، «وكتيابر بالالارى»، «سوسياليستىك قازاقستان» گازەتتەرىندە جاريالانعان 11 ولەڭى، بەس ماقالا-وچەركى، ەكى اۋدارما ولەڭى، «ايسۇلۋ» پوەماسىنان ءۇزىندى باسىلعان.
مىنە، باۋبەك شىعارمالارىنىڭ جوعارىدا اتالعان جيناقتارى بىردەن-بىرگە كىتاپ ءجۇزىن كورمەگەن تۋىندىلارىمەن تولىقتىرىلىپ، كولەمى مەن تيراجى وسە تۇسكەن.
راس، باستى ماسەلە اتالعان جيناقتاردىڭ كولەمىندە، تيراجىندا ەمەس، سولاردىڭ مازمۇنى مەن شىعارىلۋ ساپاسىندا عوي. بۇل تاراپتا ءبىز ەڭ الدىمەن سولاردىڭ دەر كەزىندە جارىق كورۋى، باۋبەك بۇلقىشيەۆتىڭ سوڭىندا قالعان تۆورچەستۆولىق مۇراسىن جاس بۋىندارعا جەتكىزۋدە، بۇلاردى سوۆەتتىك پاتريوتيزم، ينتەرناسيوناليزم رۋحىندا تاربيەلەۋدە قوسىلعان كەلەلى ۇلەس بولعانىن ەرەكشە اتاپ وتكىمىز كەلەدى.
1943 جىلى شىققان العاشقى جيناقتىڭ بارلىق تيراجى مايدانعا، جاۋمەن جاعالاسقان جاۋىنگەرلەرگە جىبەرىلگەندىكتەن، تىلداعى وقىرمانداردىڭ، ادەبيەتشىلەر مەن جۋرناليستەردىڭ كوزىنە ىلىنبەي قالدى. مىنە، سوندىقتان دا بولار، تەك 1948 جىلى ەكىنشى جيناعى دۇنيەگە كەلگەن سوڭ عانا رەسپۋبليكامىزدىڭ مەرزىمدى باسپاسوزدەرىندە ومىردەن ەرتە كەتكەن جاس تالانتتىڭ تۆورچەستۆولىق، ەڭبەكتەرىنە العاشقى تەرەڭ سارالاۋلار جاسالعان مازمۇندى رەسەنزيالار جاريالانا باستادى. وسىعان وراي باۋبەك بۇلقىشيەۆ 1940 جىلدىڭ قىزىل ارميا قاتارىنا شاقىرىلعانعا دەيىن ونىمەن جاقىن ارالاسقان سول كەزدەگى تۋىندىلارىنىڭ قالايشا جازىلىپ، جارىققا شىققانىن، تۆورچەستۆولىق وسىپ-وركەندەۋىنىڭ تىكەلەي كۋاسى بولعان رەسپۋبليكامىزدىڭ بەلگىلى ادەبي سىنشىسى، بايىرعى ءجۋرناليسى سەيدىلدا تولەشوۆ «سوسياليستىك قازاقستان» گازەتىنىڭ 1949 جىلدىڭ 19 يۋلىندەگى سانىندا باۋبەكتىڭ جيناعىنا ەڭ ءبىرىنشى رەسەنزيا جاريالادى. سونان كەيبىر ۇزىندىلەر كەلتىرە كەتكەنىمىز ءجون:
«باۋبەك بۇل جيناعىن كورە الماي كەتتى. ونىڭ ارمانى ءومىر ءسۇرۋ، تۋعان ەلىنىڭ ادال ۇلى بولۋ، ەڭبەك ەتۋ، ونىڭ جەمىسىن كورۋ ەدى. وسىنداي ءتاتتى قيالدىڭ قۇشاعىندا جۇرگەندە، ۇلى وتانىمىزدى جاۋدان قورعاۋ جورىقتارىندا ەرلىك ىستەر كورسەتىپ جۇرگەندە جاۋ وعىنان قازا تاپتى.
ول مۇلدە از ءومىر ءسۇردى. ول ۇنەمى ءومىر ءسۇرۋ، ەڭبەك ەتۋ جايىن ايتۋشى ەدى. ءومىر بەرگەن زامانىن قىزىعا جىرلايتىن ەدى... ۆ. گ. بەلينسكيي: «اقىن تاماشا، سۇيكىمدى جانعا عاشىق بولعانداي يدەياعا عاشىق بولادى، سوعان جان-تانىمەن قۇمارتادى»، — دەگەن. ناعىز اقىنداردا بولاتىن وسى كۇش، قۇمارلىق، قۋات، يدەياعا عاشىقتىق باۋبەك ولەڭدەرىنىڭ، اسىرەسە قارا سوزدەرىنىڭ ۇزىلمەس جەلىسى بولىپ ايقىن سەزىلىپ تۇرادى... «جاۋىزدىق پەن ماحاببات»، «ءومىر مەن ءولىم تۋرالى»، «ءومىر سۇرگىم كەلەدى»، «زامان، جاستار، بىزدىكى»، «شىعىس ۇلىنا حات»، «تىڭدا، كاۆكاز» سياقتى وتكىر شىعارمالارىندا اقىننىڭ ناعىز پاتريوتتىق كوزقاراسى، سوۆەت جاسىنىڭ جىگەرى مەن قايراتى، نامىسى، ءومىردى سۇيە بىلگەن كىرشىكسىز تازا نيەتى تەرەڭ ويمەن كوركەي سۋرەتتەلگەن...»
ەندى، قازاقتىڭ جۋرناليستەر وداعى قۇرىلعان شاقتا قالامگەرلەرىمىزدىڭ سەزى قارساڭىندا «كازاحستانسكايا پراۆدا» گازەتىنىڭ 1959 جىلعى 4 مارتتاعى سانىندا جاريالانعان، سول كەزدە ادەبيەتىمىزدە جاڭا عانا كورىنە باستاعان، ءقازىر بەلگىلى جازۋشىمىز ءانۋار ءالىمجانوۆتىڭ باۋبەكتىڭ ءومىرىن جانە تۆورچەستۆولىق جولىن جەتە دە دۇرىس باعالاۋعا ۇتىمدى باعىت بەرگەن «جيزن پرينادلەجيت نام!» اتتى ماقالاسىنا توقتالايىق:
«...باۋبەكتىڭ شىعارمالارى تارتىمدىلىعىن، يدەيالىق جانە كوركەمدىك كۇشىن جويعان جوق. ونىڭ ولەڭدەرى مەن وچەركتەرى تاماشا قازاق سوۆەت ءجۋرناليسى ساتتار ەرۋبايەۆتىڭ شىعارمالارى سياقتى جالىندى، تەمپەرامەنت تەرەڭ ۇشقىرلىق، قۇشتارلىق پەن جاستىققا، وتكىر وي-پىكىرگە تولى. ساتتار ەرۋبايەۆ قايتىس بولعان سوڭ، ەكى جىلدان كەيىن قازاق جۋرناليستيكاسىنا كەلگەن باۋبەك بۇلقىشيەۆ ونىڭ جۋرناليستىك قىزمەتىندەگى ەڭ جاقسى جاقتارىن بويىنا ءسىڭىرىپ، شەبەرلىگىن وزىنە ۇلگى ەتتى. ول ساتتار سياقتى جاڭا ءومىر ءۇشىن بەلسەندى كۇرەسكەر، وتكىر پۋبليسيست بالدى. ساتتار دا، باۋبەك تە رەاليست جۋرناليستەر...»
50-جىلداردىس ەكىنشى جارتىسىنان باستاپ 80-جىلدارعا دەيىن بۇلاردان باسقا دا، كەيبىر كەمشىلىكتەرىنە قاراماستان، باۋبەك بۇلقىشيەۆتىڭ ءومىر جولى مەن تۆورچەستۆوسىن تەرەڭىرەك تۇسىنۋگە، ۇلگى ەتۋگە، سونداي-اق جارىق كورگەن جيناقتارىنىڭ مازمۇنىن، ءورىسىن تاني بىلە تۇسۋگە مۇمكىندىك بەرگەن، وقىرمانداردىڭ قالىڭ بۇقاراسىنىڭ، ادەبيەتشىلەر مەن تاريحشىلاردىڭ نازارىن ەرەكشە اۋدارعان ءبىرقاتار رەسەنزيا، ماقالا، زەرتتەۋلەر جارىق كوردى. سولاردىڭ اسەرىنەن رەسپۋبليكامىزدىڭ جوعارعى وقۋ ورىندارىن بىتىرگەن جۇزدەن اسا تۇلەكتەرى تالانتتى اعاسىنىڭ ءومىر جولى، تۆورچەستۆوسى تۋرالى ديپلومدىق جۇمىستار جازدى، قورعادى. كەيىننەن سولاردىڭ ءبىر توبى ىزدەنىس جەمىستەرىن كانديداتتىق، دوكتورلىق عىلىمي-زەرتتەۋ ەڭبەكتەرىنە وزەك ەتتى. وسى ارادا باۋبەك شىعارمالارىنىڭ العاشقى جيناقتارى شەتەلدەردە تۇراتىن قازاق جاستارىنا دا جەتىپ، بۇلاردىڭ دا ويىندا، جۇرەگىندە تۋعان ەلىنە دەگەن پاتريوتتىق سەزىم تۋدىرعانىن ايتا كەتكەن ءجون. بۇل جونىندە باۋبەكتىڭ ەكىنشى جيناعى باسىلىپ شىققان ۋاقىتتا جۇڭگو حالىق رەسپۋبليكاسىنىڭ شىڭجان ايماعىندا تۇرعان، ال ءقازىر سسسر جازۋشىلار وداعىنىڭ مۇشەسى قۇرمانباي تولىبايەۆتىڭ بىزگە 1976 جىلى جازىپ بەرگەن ەستەلىگىنەن بىرەر سەز:
«جىلتىرلاۋ اق قاعاز مۇقابالى وسى ءبىر كىشكەنتاي كىتاپشا مەنىڭ قولىما وسىدان 28 جىل بۇرىن ءتۇسىپ ەدى. بۇل 1948 جىلدىڭ سوڭعى ايى، قاقاعان قىس بولاتىن. سول جىلى قۇلجا قالاسىندا شىعا باستاعان «وداق» جۋرنالىندا ىستەيتىنمىن...
بۇل لەنين كومسومولىنىڭ 30 جىلدىق مەرەكەسى قارساڭىندا شىققان باۋبەك بۇلقىشيەۆتىڭ كىتاپشاسى ەدى. ولەڭدەرى مەن ماقالالارى ەنگەن وسى جيناقتى ۇيگە كەلە سالىسىمەن وقۋعا كىرىستىم. ءا دەگەننەن قىزىققانىم — ءتىلىنىڭ بالداي ءتاتتى شۇرايلىلىعى. وي تەرەڭدىگى ماعان ءتۇپسىز مۇحيتتاي بوپ كورىندى. تامسانا بەرەم... ءتىلدىڭ شىرىنى، ويدىڭ تەرەڭ ماعىنالىلىعى مەنى عاجايىپ ءبىر سىرلى دۇنيەگە جەتەلەدى دە كەتتى...»
باۋبەك بۇلقىشيەۆتىڭ ۇلى وتان سوعىسى جەڭىسپەن اياقتالعان سوڭ قولىمىزعا ءتيىپ، وقىعان وسى ەكىنشى جيناعى ءبارىمىزدى دە تولعاندىردى. سەبەبى مۇندا ءبىرسىپىرا جيناقتالىپ، جاريالانعان ولەڭدەرى قيان-كەسكى اۋىر كۇندەردە ونىڭ جۇرەگىنەن تۋىپ، بۇكىل سوۆەت حالقىنا جەتكەن جالىندى سوزدەرى باياعىدان قالىپتاسقان سوۆەت پاتريوتىنىڭ ار-ۇجدانى ەكەنىن تۇسىنۋگە مۇمكىنشىلىك بەردى.
وكىنىشكە وراي، وسىنىڭ ءبارى قازاق وقىرماندارىنىڭ عانا ۇلەسىنە ءتيدى. تاڭ قالارلىق جايت—ماقتانىشىمىز باۋبەكتىڭ بۇگىنگى كۇنگە دەيىن بۇكىل سوۆەت حالقىنا ورتاق ورىس تىلىندە بىردە-بىر جيناعى جارىق كورمەگەنى قىنجىلتادى. بىر-ەكى دە بولسا تۋىندىسى استانامىز موسكۆادا 1946 جىلى شىققان ءبىر جيناقتا بۇكىل سوۆەت وقىرماندارى قاۋىمىنا ۇسىنىلدى.ءبىراق، بۇل تيراجى ەتە از دۇنيە بولدى دا، كوپشىلىكتىڭ قولىنا تيمەي قالدى.
باۋبەك شىعارمالارىنىڭ جاڭا جيناعىن قۇراستىرۋ بارىسىندا، بۇدان بۇرىنعى جيناقتاردا ءىشىنارا قاتەلىكتەر، ولقىلىقتار جىبەرىلگەنىن بايقادىق.
ماسەلەن، وسىعان دەيىنگى جيناقتاردا باۋبەك بۇلقىشيەۆتىڭ ءومىربايانى، وسىعان بايلانىستى شىنايى تۆورچەستۆوسى تۋرالى انىقتاما بەرىلمەگەن. سونداي-اق، ەندى عانا بەلگىلى بولعانداي اتا-اناسىنان ەرتە ايرىلىپ جەتىم قالسا دا، سوۆەت وكىمەتىنىڭ قامقورلىعىنا بولەنگەندىگىن، تاپتىق، كۇرەستە وسىپ-جەتىلگەندىگىن، تاپتىق كۇرەستىڭ نە ەكەنىن جاقسى بىلگەندىگىن ايقىن كورسەتكەن كەيبىر ولەڭ پروزالىق جولدارى سىزىلىپ قالعان.
ءقايسىبىر جۋرناليست اقىن-جازۋشى بولماسىن، وزدەرىنىڭ ماقالاسىن، ولەڭىن، تاعى باسقا كوركەم شىعارمالارىن ءومىر سۇرگەن كۇنىنە، ايىنا، جىلىنا، سول ساتتەگى تاريحي وقيعاعا، بولمىسقا ساي جازاتىنى، ال شىعارمالارى سولاردىڭ ءومىر جولىنىڭ، تۆورچەستۆوسىنىڭ ايناسى ەكەنىن ەسكە الساق، ب. بۇلقىشيەۆتىڭ ۇسىنىلىپ وتىرعان وسى جيناعىنا دەيىن جارىق، كورگەن شىعارمالارىنىڭ باسىم كوپشىلىگىنىڭ قاي جەردە جازىلىپ، جارىق كورگەنى تۋرالى اۋىتقۋشىلىقتار بار.
وسى ەڭبەكتى جارىققا شىعارۋدا بۇرىنعى كەتكەن كەيبىر ولقىلىقتاردىڭ ورنىن تولتىرۋعا تىرىستىق. البەتتە، جاڭا جيناقتا دا كەمشىلىكتەر، ولقىلىقتار بولۋى مۇمكىن. قۇراستىرۋشى دا، «جالىن» باسپاسى دا وقىرماندار قاۋىمىنان، سول جونىندە ءوز پىكىرلەرىن، ۇسىنىستارىن ءبىلدىرۋدى وتىنەدى. وسىعان وراي، وتان ءۇشىن وپات بولعان اسىل اعامىز باۋبەك بۇلقىشيەۆتىڭ حاتتارىنان ەڭ جاقىن جورا-جولداستارىنىڭ ەستەلىكتەرىنەن بەلگىلى بولعانداي «الماتىدان اۋىلعا»، «التىن ساعات» اتتى جانە باسقا ءبىرقاتار وتە باعالى ەڭبەكتەرى بۇگىنگى كۇنگە دەيىن تابىلماي جاتقاندىعىن ەسكەرتە وتىرىپ، سولاردى ىزدەستىرە جۇرۋگە شاقىرامىز.
باۋبەك بۇلقىشيەۆتىڭ جاڭا جيناعى «جالىن» باسپاسى قىزمەتكەرلەرىنىڭ ويلاستىرا، ۇيىمداستىرا ءبىلۋىنىڭ جانە قازاقستان لكسم ورتالىق كوميتەتىنىڭ ناقتى كومەگى ناتيجەسىندە دۇنيەگە كەلىپ وتىرعانىن ايتۋ پارىز.
سەيىلحان اسقاروۆ، سسسر جۋرناليستەر وداعى سىيلىعىنىڭ لاۋرەاتى
You Might Also Like
-
«ەر باسىنا كۇن تۋسا، ەتىكپەنەن سۋ كەشەر» دەپتى حالىق. بۇل قيىن-قىستاۋ كۇن تۋسا، حالىقتىڭ قانداپ قيىنشىلىقتى بولسا دا جەڭۋگە جان ايامايتىندىعىن كورسەتەدى. وتكەن سوعىستا دا وسىلاي بولدى. ب...
