InfoHub Logo

Алматы қаласы Бостандық ауданының тұрғыны әлеуметтік желіде әкімдіктің қоқыс мәселесін шешуде жасанды интеллект (ЖИ) қолданғанын мәлімдеп, әкімдіктің жауабын жариялады. Бұл туралы Tengri Life хабарлайды.

Тұрғынның айтуынша, №125 мектеп маңындағы қоқыс мәселесі бұрыннан бар. Ол бұл туралы аудан әкімдігін белгілеп, суреттерін жариялаған. Алайда, әкімдіктен келген жауап оны таңғалдырған.

«Бостандық аудандық әкімдігі менің қоқысы бар суреттерімді алып, ЖИ арқылы қоқысты жойып, ұялмай жауап беріпті. Күлкілі!» — деп жазды автор Threads желісінде.

Жарияланған пост бірнеше сағат ішінде 100 мыңға жуық қаралым жинап, желі қолданушыларының қызу талқылауына айналды. Көпшілігі әкімдіктің әрекетін сынап, «Қазіргі заманғы мәселелерді шешудің заманауи жолдары», «Қоқысты суретте емес, нақты жерде тазалау керектігін айтпаған шығарсыз» деген сияқты пікірлер қалдырды.

Желідегілер «бұрын» және «кейін» деген суреттердегі ракурстың, көлеңке мен жарықтың бірдей екенін байқап, әкімдіктің ЖИ қолданғанына сенімді болды. Кейбір қолданушылардың айтуынша, әлеуметтік желі суретті ЖИ арқылы өңделгенін немесе жасалғанын белгілеп те қойған.

Бұл жағдай бойынша Алматы қаласы әкімдігінен түсініктеме алуға тырыстық, алайда жарияланым сәтіне дейін жауап ала алмадық.