InfoHub Logo

Алматыдағы маңызды көшелердің бірі – Розыбакиев көшесіне қазақтың көрнекті ақыны, Қазақстанның Еңбек Ері Мұхтар Шахановтың есімін беру туралы ұсыныс қоғамда қызу талқылануда. Бұл бастаманы белгілі заңгер Мейірман Шекеев қолдап, Президент Қасым-Жомарт Тоқаевқа арнайы үндеу жолдады.

Бұл туралы Infohub.kz ақпарат агенттігі хабарлайды.

Заңгердің Президентке үндеуі

Мейірман Шекеев өз үндеуінде, қазіргі заңнама бойынша, қайтыс болған тұлғаның есімін көшеге беру үшін оның дүниеден озғанына кемінде бес жыл өтуі керектігін атап өтті. Мұхтар Шаханов 2026 жылғы 19 сәуірде қайтыс болғандықтан, бұл талап ұсынысты дереу орындауға кедергі келтіреді.

Алайда, заңгер бұл жағдайды ерекше мән-жай ретінде қарастыру қажеттігін алға тартты. Ол бұған дейін де Қазақстанда көше атауларын беру немесе өзгерту кезінде ерекше шешімдер қабылданғанын, соның ішінде Астана қаласының атауын өзгерту мен Алматыдағы Фурманов көшесінің қайта аталуын мысалға келтірді.

Мұхтар Шахановтың еліміздегі орны

Мейірман Шекеев Мұхтар Шахановтың қазақ қоғамындағы ерекше орнын ерекше атап өтті. Оның пікірінше, ақын Желтоқсан оқиғасының шындығын ашуда, мемлекеттік тілдің мәртебесін қорғауда және ұлттық рухты көтеруде зор үлес қосқан. Сондықтан Алматының маңызды көшелерінің біріне оның есімін беру – оның елі алдындағы еңбегіне көрсетілетін лайықты құрмет болады.

Естеріңізге сала кетейік, Мұхтар Шаханов 84 жасқа қараған шағында 2026 жылғы 19 сәуірде өмірден озды. Ақынның соңғы аманаты орындалып, ол туған жері – Отырар өңіріндегі Арыстан баб кесенесі маңына жерленді.