InfoHub Logo

Жаз – демалыс, саяхат және серуен маусымы. Алайда бұл мезгілде тұрғындарды алаңдатуы тиіс тағы бір мәселе бар: жедел ішек инфекцияларының өршуі. Ауа райының ыстық болуы, сақтау тәртібін бұзған тағамдар мен гигиена талаптарының орындалмауы салдарынан бұл ауру түрі жыл сайын жүздеген адамның денсаулығына кері әсер етуде.

Дүниежүзілік денсаулық сақтау ұйымының дерегінше, ішек инфекциясы – балалар өлімінің басты себептерінің бірі. Қазақстанда да бұл жағдай өзекті күйінде қалып отыр.

🍽 Тамақтан улану маусымы

Жаз мезгілінде әсіресе көшеде дайындалған фаст-фуд өнімдері, табиғат аясындағы пикниктер мен сапасыз жуылған жеміс-жидектер – инфекцияның негізгі көзі. Көбіне тұрғындар іш өтуді жай ғана уақытша ауру деп қабылдайды. Алайда бұл симптом – әлдеқайда күрделі аурулардың көрінісі болуы мүмкін.

💬 Профессор Динагүл Баешева:
«Диарея – кішкентай балалар үшін аса қауіпті. Егер бала әлсіреп, көзі шүңірейіп, тамақ пен суды қабылдамай, құсып, мазасызданып, ұйқышылданса – бұл ауыр сусызданудың белгісі. Мұндай жағдайда уақыт жоғалтпай, бірден дәрігерге жүгіну қажет».

🔬 Қауіп қайдан төнеді?

Жедел ішек инфекцияларын қоздыратын негізгі микроағзалар – вирустар мен бактериялар. Олардың арасында ротавирус, сальмонелла, шигелла сынды өте қауіпті түрлері бар. Бұл қоздырғыштар:

• дұрыс термиялық өңделмеген тағамдарда;
• тұрмыстық заттар мен лас қолдарда;
• сапасыз сумен жуылған өнімдерде кездеседі.

Кей жағдайларда науқас ауыр сусыздану салдарынан ауруханаға түсіп, арнайы ем қабылдауға мәжбүр болады. Мұндай инфекция әсіресе 5 жасқа дейінгі балалар мен егде жастағылар үшін қауіптірек.

✅ Алдын алу жолдары

Ішек инфекцияларынан қорғанудың ең тиімді жолы – алдын алу шараларын қатаң сақтау. Дәрігерлер келесі кеңестерге құлақ асуға шақырады:

• Қолды жиі сабындап жуу;
• Тамақ өнімдерін дұрыс сақтау және термиялық өңдеу;
• Тазартылған немесе қайнатылған суды ғана пайдалану;
• Көшеде дайындалған немесе сақтау мерзімі күмән тудыратын тағамдардан бас тарту.

Жазғы күндердің бейқам өтуін қаласаңыз – кез келген іш өтуге немқұрайлы қарамаңыз. Аурудың алғашқы белгілері пайда болған сәтте дәрігер кеңесіне жүгінген жөн.