InfoHub Logo

АҚШ-тың Вирджиния штатындағы I-95 тасжолында болған ауыр жол апаты бес адамның өмірін қиды. Тойға бара жатқан отбасының төрт мүшесі оқиға орнында қаза тапса, тағы біреуі ауыр жарақатпен ауруханаға жеткізілді. Бұл туралы ult.kz хабарлады.

Қайғылы оқиға жолаушылар автобусының жол жөндеу жұмыстары жүргізіліп жатқан аумақтағы кептеліске соғылуынан басталған. Тергеу мәліметтері бойынша, автобус жүргізушісі алда тұрған көліктер легін дер кезінде байқамай, бірнеше жеңіл және жол талғамайтын көліктерге соғылған. Қатты соққыдан кейін көліктердің бірі өртеніп кетті.

Оқиға орнында дүрбелең туындап, кейбір жолаушылар сынған терезелер арқылы сыртқа шығуға мәжбүр болды. Жол апатынан кейін ондаған құтқарушы, өрт сөндіруші және жедел жәрдем бригадалары жұмылдырылды. Барлығы 40-тан астам адам түрлі жарақат алып, жақын маңдағы медициналық мекемелерге жеткізілді. Кейбір зардап шеккендердің жағдайы ауыр деп бағалануда.

Қазір автобус жүргізушісіне абайсызда адам өліміне әкеп соққан әрекет бойынша айып тағылып, оқиғаның барлық мән-жайы анықталуда. Тергеушілер жүргізушінің жылдамдық режимін сақтағанын және шаршау факторларын да тексеріп жатыр. Бұл апат АҚШ-та биылғы жылы тіркелген ең ірі жол-көлік оқиғаларының бірі ретінде бағаланып отыр.